Ирон кафты рæсугъд бæрæгбон сарæзтой абон Æрæфы районы. Республикæйы сæргълæууæг Битарты Вячеславы хъæппæрисæй ирон адæмы аивады номыл конд мадзæлттæ парахат кæнынц районты. Цыколайы спортивон фæзыл ацыд цыппæрæм фестиваль «Ирон кафт». Йæ аразджытæ сты Цæгат Ирыстоны Культурæйы министрад, Републикæйы адæмон сфæлдыстады хæдзар æмæ Æрæфы районы культурæйы разамынд.
Нæ республикæйы курдиатджын фæсивæд бирæ кæй ис уый дызæрдыккаг нæу. Абон ахæм фæсивæдæн Æрæфы районы уыд æцæг бæрæгбон. Ирон кафты дæснытæ сæ арæхстдзинад равдыстой фестивалы. «Ирон кафт»-хуынгæ дæр афтæ кæны. Мадзалмæ æрбацæуджыты архайджыты уæнгты азмæлд дисы æфтыдта.
Фестиваль сарæзтой цыппæрæм хатт. Архайынц дзы республикæйы районты кафæн къордтæ. Фæлæ ансамбльтæм ис иу фиппайнаг-концертон пограммæйы æрмæстдæр ирон кæфтытæ. Фестиваль аразджытæ куыд зæгъынц, афтæмæй ацы мадзалы сæйраг нысан у фæсивæды `ргом ирон кафтмæ раздахын.
Ацы аз фестивалы архайы 300 адæймагæй фылдæр. Уыдон сты республикæйы районтв минæвæрттæ. Архайджытæ сæхи равдисынмæ æппындæр сæ тыхтæ не `вгъау кæнынц. Сæ хуыздæрты сын схорзæхджын кодтой кады гæххæтытæ æмæ зæрдыл дарæн лæвæрттæй.
Азæй-азмæ фестивалы арæнтæ уæрæхдæр кæнынц. Абон бæрæгбонмæ æрбацыдысты уазджытæ Кæсæг-Балхъарæй дæр. Лескены ансамбль «Анзорей»-йы архайы 20 адæймаджы. Абон сеппæтдæр концерт фархайдтой. Куыд зæгъынц, афтæмæй бæрæгбон сæ зæрдæмæ тынг фæцыд.
Бæрæгбон аразджытæм фидæнмæ бирæ хъуыдытæ ис. Фыццаджыдæр уал сæ фæнды фестиваль æппæтуæрæсеон скæнын. Уымæй уæлдай ма фæхонын Абхази, Хуссар Ирыстон æмæ æндæр бæстæты кафын къордтæ дæр. Ахæм архайджытимæ фестиваль суыдзæн æппæтдунеон.
Къуымæллæгкаты Фатимæ