Дзæуджыхъæуы 48-æм скъолайы хъармгæнæн хæтæлтæ сцалцæг кодтой. Цыппæрæмы, æхсæвы, бæстыхайы пъадвалы хъармгæнæн хæтæлы кæцыдæр хай атъыдта.
Кусджыты къорд уайтагъд æвирхъау цау аиуварс кæнынмæ æрбаллæуыдысты. Фæлæ йæ сæхи хъаруйæ сцалцæг кæнын сæ бон не`сси. Æххуыс мæ фæдзырдтой цæрæнуæтты комуналон службæйы специалисттæм. Иумæйаг тыхтæй фæстиуджытæ аиуварс кодтой. Хæтæлтæ цы бон атыдтой, уыцы бон уроччытæй раидиан кълæсты ахуырдзауты суæгъд кодтой. Хистæр кълæсты ахуырдзаутæн та фæцбыр сты 30 минуты онг. Переменæтæ та цыдысты 5 минуты. Ахæм фæткимæ скъола куыста цалдæр боны. Специалисттæ дæр сæ куыст кодтой. Знон изæры 6 сахатыл цалцæггæнæн куыстытæ кæронмæ фесты. Скъолайы директор æмæ ахуыргæнджыты ныхæстæм гæсгæ, цалынмæ хæтæлтæ арæзтой, уæдмæ кълæсты тæвд барæн амыдта 18 градусы хъарм. Спортзал æмæ къæридорты та – 16 градусы. Ныртæккæ, тæвдбарæн амоны алы къласы дæр 20 градусæй фылдæр хъарм.
Дзæуджыхъæуы №48 скъолайы директор Лилия Юсупова: «Санитарон-эпидемиологон службæйы бæрæггæнæнтæм гæсгæ скъолайы хъарм уыд. Къуырисæр æмæ дыццæджы мах барстам бæстыхайы хъарм. Дыццæджы тæвдбарæн амыдта 18 градусы хъарм. Санитарон-эпидемиологон службæйы бæрæггæнæнтæм гæсгæ уый нормæ у. Дзæуджыхъæуы администраци сæргълæууæг Æлбегаты Барисы æмæ Тамайты Майрæмы руаджы цыбыр рæстæгмæ æппæт хъæугæ мадзæлттæ дæр сарæзтой».