Нæ дарддæры æрмæджы хъайтар та у Хъыргъаты Руслан. У дзюдойæ æмæ джиу-джитцуæ тренер. Йæ бæрны, спортæй архайынц, куыд лæппутæ, афтæ чызджытæ дæр. Иу æмæ дыууæ хатты сæхи æнтысджынæй нæ равдыстой алы хуызон ерысты. Спорты бæрзæндтæм тырнырц уæндонæй. Фæуæлахиз вæййынц канд нæ республикæйы цы турниртæ саразынц, уым нæ, фæлæ ма Уæрæсейы æмæ фæсарæнты дæр. Афтæмæй сæ тренер Хъыргъаты Руслан йæ куыстæй разæнгард кæны. Куыд зæгъы, афтæмæй йæм цæуы, раст цыма бæрæгбон у, афтæ. Абон йемæ фембæлыд нæ уацхæссæг Къуымæлæгкаты Фатимæ. Иумæ аныхас кодтой йæ тренеры куысты тыххæй, радзырдта фидæниæ ма йæм цы пълæнттæ ис, уый тыххæй дæр. Цы рауад сæ ныхасæй, уымæ ма бакæсут.
Дзасохты Ацæмæз дзюдомæ цæуы афæдз. Кæд нырма лæппу хæрз æрыгон у, уæддæр йæм фидæнмæ ис стыр хъуыдытæ. Æмæ иууылдæр сты баст спортимæ. Уымæ йæ разæнгард кæны йæ тренер. Фæзминаг хистæр æй хоны.
Хъыргъаты Руслан тренеры куыст кæнын райдыдта 2009 азы, Джызæлы. 2011 азы рацыд Дзæуджыхъæумæ, спортивон комплекс «Динамо»-мæ. Уæдæй абонмæ архайы рæзгæ фæлтæримæ. У дзюдо æмæ джиу-джитсуйы тренер.
Хорзы хабар дардмæ хъуысы, зæгъгæ, дзæгъæлы нæ фæдзурынц. Хъыргъаты Русланмæ сывæллæттæ цæуынц алы районтæй æмæ хъæутæй. Йемæ кусынц зæрдæрайгæйæ.
Сывæллæтимæ ахæм лæмбынæг куыст кæй кæны, уый цæуы ныййарджыты зæрдæтæм дæр. Йæ кæстæры, дам, æвзæр ахуыргæнæгмæ ничи бакæндзæн. Русланæн йæ алы къорды 50 сывæллонæй фылдæр кæй ис,уый дæр бирæйы нысан у.
Сывæллæты хсæн ис секцитæм цæуынæн, сæ дзыпп кæмæн нæ амоны, ахæмтæ. Уыдонимæ Руслан кусы лæвар. Бирæ хæттыты аласы æххуысцух бинонты сывæллæтты ерыстæм. Бацагуры сын хæрзгæнджыты æмæ сæм афтæ фæкæсы. Русланæн йæхицæн ис 5 фырты. 4 дзы архайынц дзюдойæ. Тренер куыд дзуры,афтæмæй йæ ахуырдзаутимæ дæр раст цыма йæхи сывæллæттæ, афтæ кусы. Уый бæрæг у йæ ныхасыл дæр.
Сывæллæтимæ Хъыргъаты Руслан æнгом куыст æрмæст залы нæ кæны.Йæ кæстæртæн у фæзминаг хистæр. Арæх йæ ахуырдзауты аласы æрдзмæ. Уыс сæхи фæирхæфсын. Афтæмæй сæ ахуыр кæны æмгарджын æмæ хæларзæрдæтæ уæвын.
Къуымæллæгкаты Фатимæ
