Иронау сдзырдтой

«Маша и медведь» æмæ «Фиксиктæ» дæр абон сдзырдтой иронау. Дзæуджыхъæуы национ библиотекæйы проект «Операци Æ»-йы фæлгæты равдыстой мультипликацион кинонывтæ. Мадзал сбастой мадæлон æвзаджы бæрæгбонимæ. Кинонывтæ ратæлмац кодтой Цæгат Ирыстоны национ спорты хуызтæ, хъæзтытæ æмæ культурæйы федерацийы хъæппæрисæй. 2016-æм азæй фæстæмæ сыл куыстой хуыздæр æвзагиртасджытæ. Ныридæгæн уал ратæлмац кодтой 10 серийы. Проектæн йæ сæйраг хæс у ирон æвзаг бахъахъхъæнын æмæ йæ райрæзтыл бацархайын. Йæ автортæ куыд зæгъынц, афтæмæй мультипликацион кинонывтæ æвдисдзысты Цæгат æмæ Хуссар Ирыстоны скъолайы агъоммæ кусæндæтты. Абоны равдыстмæ уазæгуаты æрбацыдысты нæ республикæйы культурæйы министр Къубалты Эльбрус æмæ нациты ‘хсæн ахастдзинæдты фарстаты фæдыл министр Цуциты Аслан. Куыд фæбæрæг кодтой, афтæмæй проекты аразджытæ кæнынц ахсджиаг æмæ хъæугæ куыст. Фидæны ма иронау сдзурдзысты «Смешариктæ» дæр.