- Абонæй фæстæмæ, официалон æгъдауæй, кусын райдыдтой хицауады сæрдары хæдивджытæ Икъаты Русланбег æмæ Азымты Иринæ.
- Дзæуджыхъæуы администрацийы сæргълæууæджы хæдивæг Тамайты Майраны снысан кодтой цæрæнуæтты-коммуналон хæдзарад, артаг æмæ энергетикæйы министрæй.
- Фæллой æмæ социалон рæзты министрады сæргъы æрлæууыд республикæйы сæргълæууæджы æххуысгæнæг Хуыбаты Барис.
- Годжыцаты Тамерлан сси Цæгат Ирыстоны хицауады сæрдары хæдивæг æмæ æнæниздзинад хъахъхъæнынады министр.
- Физкультурæ æмæ спорты министрæй Бæройты Хасаны бæсты сæвæрдтой футболæй Уæрæсейы иугонд командæйы раздæры дуаргæс Гæбулты Владимиры.
- Цæгат Ирыстоны культурон хæзнатæй пайда кæныны æмæ хъахъхъæныны комитеты сæрдары бынат бацахста Æгайты Эмилия.
- Культурæйы министры хæстæ рæстæгмæ æххæст кæндзæн Къубалты Эльбрус.
- Цæгат Ирыстоны ахуырад æмæ наукæйы министры хæстæ та рæстæгмæ æххæст кæндзæн Людмила Башарина. Финансты министры хæстæ æххæстгæнæгæй сфидар кодтой Бутаты Хъасболаты.
- Цæгат Ирыстоны хицауады сæрдары хъæппæрисмæ гæсгæ Анатолий Поляков суæгъд кодта вице-премьеры бынат. Сси республикæйы сæргълæууæджы æххуысгæнæг Мæздæджы районы фарстаты.
- Цæгат Ирыстоны арæзтад æмæ архитектурæйы министрæй сфидар кодтой Касаты Таймуразы.
Æндæр куысты бынæттæм кæй рахызтысты, уый тыххæй сæ бынæттæ суæгъд кодтой культурæйы министр Милдзыхты Руслан, цæрæнуæтты-коммуналон хæдзарад, артаг æмæ энергетикæйы министр Сохъуырты Альберт, Физкультурæ æмæ спорты, стæй фæллой æмæ социалон рæзты министрты хæстæ æххæстгæнджытæ Бæройты Хасан æмæ Хъесаты Игорь. Æмткæй райсгæйæ, ивддзинæдтæ баййæфтой 13 министрады æмæ 6 комитеты. 7 вице-премьеры дæр ивд æрцыдысты. Республикæйы сæргълæууæджы уынаффæмæ гæсгæ, хицауады хæдивджытæ иу фылдæр фæуыдзысты.