Абон æрмæст Цæгат Ирыстоны нæ, фæлæ ма æндæр бæстæты цæрæг адæм дæр мысынц 2002-æм азы 20-æм сентябры цаутæ. 16 азы фæстæ дæр ма Хъолайы цъити фенынмæ ардæм бирæ адæм æрбацæуынц.
Абон Джызæлы цы монумент ис, уымæ адæм хæссынц дидинджытæ. Æрдзон фыдбылыз амæттæгтæ рох не сты республикæйы сæргълæууæг Битарты Вячеславæй, парламенты æмæ хицауады уæнгтæй, министртæй. Сæ номыл цыртдзæвæныл сæвæрдтой дидинджытæ æмæ веноктæ. Уымæй уæлдай ма Хъолайы цъитийы бын чи фæци, уыдоны нæмттæ æрымысыдысты æхсæнадон организациты уæнгтæ, скъоладзаутæ æмæ студенттæ. Уыцы цауы фæмард 127 адæймаджы, се хсæн режиссер Сергей Бодровы киноисæн къорд æмæ бæхты театр “Нарт”-ы артисттæ. Цалдæр минутмæ Хъолайы цъити комы раивылд.
Уыцы бын комы чи уыд, уыдон йæ быны фесты. Бирæ рæстæг ма хиуæттæ, бæргæ, агуырдтой сæ хæстæджыты æмæ зонгæты. Фæлæ дзы ссардтой æрмæст 19-ы. Ныртæккæ ахуыргæндтæ æрвылбон сæ цæст дарынц цъитимæ. Сæ бæрæггæнæнтæм гæсгæ дзы адæмæн тæссаг нæу.
