Сæрæнгуырдтæ

Республикæйы фæндæгтыл цæуыны æдасдзинады инспекцийы кад кодтой, сæ цæсты чи фесгуыхт, уыцы дыууæ лæппуйæн. Январы фæллойадон хатдзæгтæ кæныны рæстæг кусæндоны разамонæг Хуадонты Айвар арфæ ракодта, фыдгæнæджы бауромын кæй къухы бафтыд, уыдонæн. Инспекцийы хицау сын саккаг кодта арфæйы фыстæджытæ æмæ зынаргъ лæвæрттæ. Цæвиттон, Къадзаты Тимур æмæ Гуыдиаты Аслан барадхъахъхъæнджытæм никуыдæй æмхиц сты. Фæлæ уыцы бон фесты фыдбæллæхы `вдисæнтæ. Беслæнмæ хæстæг иу хæдтулгæ скъуырдта фистæгæй цæуæджы. Нæлгоймаг фæмард. Шофыр бацархайдта йæ сæр бафснайыныл, хъавыд фыдбылызы бынатæй алидзынмæ. Къадзаты æмæ Гуыдиаты сæрæнгуырдтæ уый куы федтой, уæд йæ фæдыл ныййарц сты æмæ йæ рацахстой. Уæдмæ фæндаггон инспектортæ дæр æрбахæццæ сты æмæ дыууæ лæппуйы фыдгæнæджы барады кусджыты къухмæ радтой. Абон сын сæ хорздзинадæн инспектортæ аргъ скодтой. Хуадонты Айвары ныхæстæм гæсгæ, лæппутæ сæхиуыл нæ бацауæрстой, равдыстой æцæг лæджы миниуджытæ. «Æрмæстдæр иумæйаг тыхтæй нæ бон бауыдзæн æнæпълан шофырты рохтыл æрхæцын æмæ уын стыр бузныг зæгъæм!» – фæнысан кодта паддзахадон инспекцийы разамонæг.