Нæ республикæйы йæхиуыл йæ къух чи систа, уыцы адæмы нымæц фæфылдæр. Аххосæгтæ алыхуызон сты. Чи царды зын уавæры бахауд æмæ йын цы кæна, уый нæ зоны. Иннæмæн йæ ныфс асæтты, чи та цыдæр лыстæг къуырцдзæвæнæй йе стырдæр бæллæх саразы. Хиуыл хæцын йæ бон кæмæн нæу, уыдоны ахæм хъуыдытæ æрсæттынц æмæ сæ быны ныссæндынц. Иутæ дзы химæ къух сисыны фæндагыл афтæмæй бафтынц. Хъуыддæгтæ бæлвырддæрæй радзурдзысты не сфæлдыстадон къорды уæнгтæ.
Адæймагмæ фыдбылыз кæцæй кæсы, уый йæхæдæг зонгæ дæр нæ бакæндзæн. Æрæджы республикæйыл айхъуыст æвирхъау хабар æрыгон чызг йæхиуыл йæ къух систа, зæгъгæ. Уыцы цау фегуыппæг кодта канд республикæйы нæ, фæлæ æндæр регионты цæрджыты дæр. Химийæ иумæйаг паддазахадон фæлварæн кæй нæ радта, уый аххосæй чызг йæхи амарыны фæнд скодта. Æрмæст ма цыбыр фыстæг афыста. Йæ ныййарджытæй дзы куырдта хатыр. Специалисттæн сæ бон ныр дæр нæу бæлвырдæй зæгъын, ахæм цауы аххосаг цы уыд, уый. Фæлæ адæймаг арæх куы дзура, «мæ цард мæ нал хъæуы», «мæ бон нал у», «тæхуды, амæл», зæгъгæ, æмæ æндæр ахæм ныхæстæ, уæд æм хъæуы цæст æрдарын. Ахæм хъуыдытыл арæхдæр ныххæцынц, рæвдыдхъуаг куы вæййынц, кæнæ та сын бахъуаджы сахат æххуысгæнæг куы нæ разыны, уæд.
Хи амарыны фæнд, хъыгагæн, æрмæст ацы чызгмæ не рцыд. Сау хабар æхсæз хæдзары дуарыл бахызт. Ахæм зæрдæриссæн цау суанг нæ телекомпанийы æппæт кусджыты зæрдæтæ дæр фæкъахта. Хъыгагæн, йæ цардæй ацыд не мкусæг, КВН-ы командæ «Пирамидæ»-йы раздæры архайæг Æлборты Аслан. Сæхиуыл сæ къух систой барадхъахъхъæг оргæнты æртæ кусæджы, стæй арæнхъахъхъæнæн управленийы пресс-службæйы минæвар дæр. Адæмы хсæн ма ныр дæр фехъусæн ис ног цауты тыххæй. Социалон хызæгты та мингай комментаритæ. Ахæм цаутæ адæмы тыхсын кæнынц æмæ сæ дисы фтауынц. Фæлæ алцыдæр психикæйы аххос кæнын раст нæ уыдзæн. Дохтыртæ куыд зæгъынц, афтæмæй хи амарыны фæнд хæрз æнæниз адæмы сæры дæр фæзыны. Фылдæр хатт адæймаг стыхсы, уавæр куыд сраст кæна, уый нæ фæзоны æмæ, хъыгагæн, фырадæргæй ахæм адзал ссары.
Уæвгæ, алцыдæр адæймаджы удыхъæд æмæ карæй аразгæ у. Фæлæ ма бирæтыл бæрæг дары афæдзы афон дæр. Психологты хатдзæгтæм гæсгæ, хи амарыны хъуыдытæ адæммæ арæхдæр майы вæййынц. Фарста ахсджиаг кæй у æмæ йæ лыг кæнын кæй хъæуы, уый нæ республикæйы специалисттæн æнæзонгæ нæу. Зонынц, йемæ куыд тох кæнын хъæуы, уый дæр. Ахæм рынчынтæн ма ис реабилитаци скæнæн. Кæд зын у, уæддæр хорз бæрæггæнæнтæ дæтты. Сæйрагдæр у, адæймагмæ хи амарыны хъуыдытæ афоныл раиртасын. Æмæ йæ иунæгæй ма уадзын йæ зындзинæдты ныхмæ.
