Бронзæйæ æмæ сыгъзæринæй конд дзаумæттæ, графикон нывæфтыдтæ. Дзæуджыхъæуы, Дзанайты Азанбеджы номыл аивæдты училищæйы, кадджын уавæры байгом кодтой равдыст.
Экспозици арæзт æрцыд ахуыргæнæндоны 45-æм азы кадæн. Равдыстмæ бацæттæ кодтой канд ахуыргæнджыты æмæ ахуыргæнинæгты куыстытæ нæ, фæлæ ма училищæйы рауагъдонтæй зынгонд нывгæнджыты куыстытæ дæр. Нывæфтыдтæ адих кодтой цалдæр хуызы: нываивад, графикæ, скульптурæ æмæ æндæртæ. Мадзалмæ уазæгуаты æрбацыдысты ахуыргæнæндоны раздæры кусджытæ. Уымæй уæлдай ма, равдыстмæ саккаг кодтой Цæгат Ирыстоны культурæйы министрады минæвæрттæ дæр.
Дзæуджыхъæуы Дзанайты Азанбеджы номыл аивæдты училищæйы разамонæг Фидараты Фидар: «Равдысты сæйраг хъуыды у – адæмæн куыд цæрæм, уый равдисын. Цы аразæм, цæуыл кусæм уый. Уæ бон фенын у нæ фыццаг рауагъдонты куыстытæ дæр. Фæнды нæ æрбацæуджыты не`сфæлдыстадимæ базонгæ кæнын. Цавар хайæдтæ нæм ис. Æдæппæтæй нæм ис 3: дизайн, нываивад æмæ декорацитæ.»