Хъæлæс

Адæймагимæ фембæлгæйæ, кæнæ искæимæ базонгæ кæнгæйæ æппæты фыццаг нæ цæст цæуыл æрхæцы? Цы бахъуыды кæнæм? Исчи зæгъдзæн йæ гуыры конд, чи цæстытæ, чи цæсгомывæрд… Бирæ цыдæртæ ма дзы ис ранымайæн.
Алцыдæр у нæхæдæг цы уарзæм æмæ кæимæ дзурæм, уымæ нæ зæрдæмæ цы фæцыд, уый. Бирæтæ цæстытæ абарынц стъалытимæ, былтæ — балтимæ, æрфгуытæ — маргъы базыртимæ… Фæлæ, зæгъæм ныхас кæнæм телефонæй, уæд та йæ куыдæй бамбарæн ис цавæр адæймагимæ дзурыс, уый?
Æрмæстдæр йæ хъæлæсы уагæй. Уый та абарæн дæр ницæйымæ ис. Алы адæймаджы хъæлæс дæр кæимæ дзуры, уымæ гуырын кæны алыхуызон æнкъарæнтæ.
Вæййы афтæ дæр æмæ чызг æмæ лæппу кæрæдзийы бауарзынц æрмæст телефонæй ныхас кæнгæйæ. Æрмæст кæрæдзийы ныхæстæм хъусгæйæ æмæ хъæлæсмæ кусгæйæ. Цæмæн æфтæ у? Нæ зонын.
Кæд мыййаг алы адæймаджы хъæлæсы цавæрдæр алæмæты зæлтæ ис? Кæнæ зæрдæмæхъаргæ æнкъарæнтæ хæссынц? Былвырд дзуапп мæм нæй. Фæлæ мæм куыд кæсы, афтæмæй дзуапп базонын нæ бон у нæ дарддæры æрмæгæй.