Дзæуджыхъæуы хатдзæгтæ кæнынц фестиваль «Амыраны рухс»-æн. Архайынц дзы Цæгат Ирыстоны алы районты сфæлдыстадон къордтæ. Æркасты спектакльтæ æмæ театралон скъуыддзæгтæ æвæрд сты æрмæст ирон æвзагыл. Йæ аразджытæ – Республикæйы фæсивæды хъуыддæгты фæдыл комитет æмæ фæсивæдон театр «Амыран». Сæйрагдæр хæс – æвзонг артистты базонгӕ кӕнын театралон традицитæ æмæ ирон драматургиимæ. Æвзарæн туртæ цыдысты дыууæ къæпхæнæй – районты æмæ республикæйы. Æрвылаз уæлахиздзаутæ сæхи равдисынц Дзæужыхъæуы. Уый фæдыл нæ горæты арæзт æрцæуы гала-концерт. Ацы аз пандемийы аххосæй фестивалы ӕрцыд ивддзинæдтæ.
Афтæ, онлайн хуызы, ацы аз цæуы хæдахуыр театралон къордты фестиваль «Амыраны рухс». Фæсивæд видеоæмæджыты руаджы æвдисынц сæ курдиат æмæ арæхстдзинад. Аргъ сын кæнынц жюрийы уæнгтæ: театралон аивады кусджытæ, профессионалон актертæ æмæ режиссертæ. Уыдон хатдзæгтæ кæнынц æмæ æвзврынц хуыздæрты сæрмагонд номинацитæм гæсгæ. Театр «Амыран»-ы разамонæг Сидахъаты Дзамболат куыд фæнысан кодта, афтæмæй æркаст райдыдта нысангонд пъланмæ гæсгæ. Фæлæ йæ пандемийæйы ахоссæй дарддæр ахæццæ кæныны фадат нал фæци.
Ныр цыппар азы дæргъы театр «Амыран» кæстæртæн гом кæны уæрæх фæндаг театралон аивады дунемæ. Æрвылаз нæ республикæйы курдиатджын фæсивæд сæ арæхстдзинад февдисынц æппæт районты сценæтыл дæр. Уым арæзт æрцæуынц фестивалы муниципалон къæпхæнтæ. Уый фæстæ, кæронбæттæн хаймæ цы архайджытæ æвзæрст æрцæуынц, уыдон се `сфæлдыстадон хъомыс сфæлтæрынц Фæсивæды республикон галуаны.
Конкурсы архайынц сфæлдыстадон къордтæ Дзæуджыхъæуæй æмæ Цæгат Ирыстоны æппæт районтæй. Æрыгон артисттæ сты, 7 азæй 30 азы онг кæуыл цæуы, ахæмтæ. Сæ арæхстдзинад æвдисынц 6 номинацийы – драмон спектакль, ирон аргъау, тексты аив кæст, эстрадон-сатирикон миниатюрæ, фольклорон-театралон æвæрдтытæ æмæ сфæлдыстадон фæлварæн.
Аивадон разамонджытæ пайда кæнынц зындгонд ирон фысджыты уацмыстæй. Сывæллæттæ сæ хъуамæ хуымæтæг каст ма кæной, фæлæ бацархайой сæ арф хъуыды бамбарыныл æмæ равдисыныл.
Фæсивæд сæ разамонджытимæ цы равдыстытæ бацæттæ кодтой, уыдон сты æрмæстдæр ирон æвзагыл. Алчидæр йæ дæсныдзинад æвдисы разæнгардæй. Фестивалы ирдæй рабæрæг вæййы, Ирыстоны курдиатджын, размæдзыд фæсивæд кæй ис, уый.
Мадзал саразджытæ сты фæсивæды хъуыддæгты фæдыл республикон комитет æмæ фæсивæдон театр-студи «Амыран». Сæ сæйрагдæр хæс уыд æвзонг артистты театралон традицитæ æмæ ирон драматургиимæ базонгæ кæнын, стæй ма сæ ирон æвзаг æмæ литературæ зонынмæ дæр сразæнгард кæнын. Уæлахиздзауты схорзæхджын кæндзысты бæрнон министрады арфæйы фыстæджытæй æмæ театр «Амыран»-ы дипломтæй.
Дзæдзойты Фатимæ
