Се ‘ппæтæн зонгæ зарæджы зæлтимæ фыццагкъласонты хонынц кадджын линейкæмæ. Сæ фарсмæ сæ æвзонг хæлæрттæ – фидæны рауагъдонтæ. Ахсджиаг сахат сабитæн, ахуыргæнджытæн æмæ ныййарджытæн. Зонындзинæдты бон Дзæуджыхъæуы 27-æм скъолайы. Уазджыты ‘хсæн раздæры рауагъдонтæ дæр.
Уæрæсейы æмæ Цæгат Ирыстоны гимнтимæ бæрзонд систой паддзахадон тырысатæ. Уымæй уæлдай ма зарджытæ, æмдзæвгæтæ æмæ арфæйы ныхæстæ. Линейкæ снысан кодтой арктикон балцæн æмæ уый æппындæр диссаг нæу, уымæн æмæ скъола хæссы Цæгатаг полюсы легендарон арктикон капитан Кучиты Юрийы ном. Бæрæгбоны мадзалмæ цæттæ кодтой къуырийы дæргъы. Æмæ мæнæ ныр скъоладзаутæн азæлыд фыццаг дзæнгæрæг.
Фыццаг ахуыргæнæг, фыццаг урок. Фæсивæд æм æхсызгонæй æнхъæлмæ кастысты. Ахуыргæнæг Ахполæтты Неля сабитæн “Агæс цæут” загъта. Райдиан скъолайæн ныридæгæн радта 30 азы. Хæстæгдæр цыппар афæдзы узæлдзæн 1-Б къласыл.
Куыд ахуыргæнджытæ, афтæ скъоладзаутæ дæр цæттæ сты ног ахуыры азмæ,- зæгъы директор. Дзырдæн, скъола республикæйы райста республикæйы сæргълæууæджы грант ” Ахуырадмæ стыр æвæрæн бахæссыны” фæдыл. Абон ам фыццæгæм къласмæ бацыдысты 93 сывæллоны. Ацы азы рауагъдонтæ та уыдзысты дыууæ 11-æм къласы.
