Иры сызгъæрин хъæлæс! Ацы ном Суанты Кимæн саккаг кодтой сæрыстыр дзы цы адæм сты, уыдон. Æгæрон аргъ ын кодтой йæ курдиатæн. Зарыди зæрдæйæ. Уæрæсейы сгуыхт артист, Цæгат Ирыстоны адæмон артисты райгуырдыл абон сæххæст 85 азы.
Композитор Махъоты Ацæмæз Суанты Кимимæ базонгæ 1980 азы, зындгонд зарæггæнæг Аскер Махмудовы фæрцы. Цы хæлардзинад сын бацайдагъ, уый тыхджын рауад. Йæ зæрдыл нырма дæр лæууы: 40 азы размæ ам, Композиторты цæдисы, репетици кодта Ким æмæ йе ‘мбæлттимæ, уыдон дæр адæмæн уарзон аивæдты архайджытæ.
Йæ музыкалон курдиат суанг сабибонты дæр бæрæг уыди. Зарыд иу ирон хъæбатырты тыххæй, хистæрты фæзмгæйæ. Скъоладзауæй æппынæдзух архайдта хихъæппæрисадон къордты. Сценæмæ фыццаг хатт рацыд 14-аздзыдæй. Йæ музыкалон фæндаг адарддæр кодта консерваторийы. Фыццаг курсы фæстæ йæм æфсадмæ фæсидтысты æмæ службæ кодта Сабыр фурды флоты. Уым дæр ын йæ курдиат æнæбафиппайгæ нæ фесты.
Ахуыры фæстæ уыд Цæгат Ирыстоны паддзахадон филармонийы солист. Уыд вокалон-инструменталон ансамбльты хыгъды дæр. Ким йæ мадæлон æвзагыл зарыди хæсты тыххæй, уарзондзинадыл, рыст æмæ амондыл. Адæмон зарæджы ног уддзæф бауадзын йæ бæллиц уыд.
Къæбойты Николаимæ Суанты Ким йæ бæллиц сæххæст кодта — сарæзтой профессионалон паддзахадон эстрадон оркестр. Абон хæссы Кимы ном æмæ 33 азы дæргъы аивадуарзджыты зæрдæтæ рухс кæны. Ирон адæмæн балæвар кодта, зæгъæн ис, æмæ аивады ног дуг.
30 азы размæ йын йæ цард трагеди аскъуыдта. Йæ ингæн ис Намысы аллейы. Кæд ныр бирæ азты не хсæн нал ис, уæддæр йе сфæлдыстад цæры ирон адæмы зæрдæты.
