Нæ фыдæлтæ цы рагон инструменттыл цагътой, уыдон ныры рæстæг систы актуалон. Дзæуджыхъæуы Гергиты Валерийы номыл аивæдты колледжы ацыд республикон семинар-практикум. Хуынд æрцыдысты хицауады минæвæрттæ, музыканттæ, ахуырадон уагдоны студенттæ. Фæндырдзæгъдджыты ансамбльты æмæ адæмон инструментты оркестрты разамонджытæ адæмы базонгæ кодтой рагон адæмон инструменттимæ. Ахæм дæсныйад æвдисæн ахуыртæ арæзт вæййынц алы аз дæр. Семинартæ конд æрцыдысты республикон адæмон сфæлдыстады хæдзары хъæппæрисæй.
Æххуыс сты адæмон инструментты ахадындзинад раргом кæнынæн. Музыкант Берозты Таймураз радзырдта уадындз, лалым-уадындз, хъисын фæндыр, дала-фæндыр æмæ æндæрты равзæрды историйы тыххæй. Программæмæ хаст æрцыдысты лекцитæ, дæсныйад æвдисæн ахуыртæ. Йæхи йæ адæмы сфæлдыстад æмæ культурæйы райрæзтæн чи снывонд кодта, уыцы адæм æрбацыдысты сæ зонындзинæдтæй фæхай кæнынмæ. Нæ ирон адæмон инструменттæй кæцыдæртæ ивгъуыды кæй баззадысты, уый тыххæй республикон адæмон сфæлдыстады хæдзары уæнгтæ архайынц, цæмæй рохуаты ма зайой, фæлæ сыл ахуыр кæной цæгъдын. Мадзал ахицæн Дзæуджыхъæуы аивæдты колледжы адæмон инструментты ансамблы концертæй.
«Абон Дзæуджыхъæуы Гергиты Валерийы номыл аивæдты колледжы адæмон инструментты фæлгæты скодтам дæсныйад æвдисæн ахуыртæ. Уыдоны фæрцы архайджытæн сæ бон уыд алы инструментыл дæр ацагъдын, цæмæй сæ хъарутæ бафæлварой æмæ банкъарой инструментæн йæ «уд», – республикон адæмон сфæлдыстады хæдзары минæвар Битарты Ларисæ.