Æдасдзинады федералон службæйы цæгатирыстойнаг управленийы кусджытæ раиртæстой тамакоты æнæзакъон контрабандæ. 700 мин къоппы барадхалджытæ фæнд кодтой æнæзакъонæй арæны сæрты æрбаласын. Уæвгæ сын уый бантыст, фæлæ сæ барадхъахъхъæнджытæ уæддæр æрцахстой.
Фыдгæнджытæй байстой 38 милуан сомæн продукци. Æнæакцизон буаргъæдтæ конд уыдысты Белоруссийы æмæ Араббаг Эмиратты. Тамакохæццæ продукци республикæйы уæй кæнынмæ хъавыдысты 4 адæймаджы. Сæ тæрхонæй уæлдай ма бафиддзысты ивар. Контролон службæты ныхæстæм гæсгæ, æнæзакъон продукци арæны сæрты чи ласа æмæ йæ кæмæ ссарой, уыдоны æфхæрдзысты закъонмæ гæсгæ.
Уæрæсейы федерацимæ цы тамакохæццæ продукци æрбаласанц, уый хъуамæ æнæмæнг ацæуа идентификаци. Юридикон бæрнондзинад чи хæссы, кæнæ амалхъом адæм ацæуынц «Честный знак» зæгъгæ порталы регистраци. Уыцы порталы фæрцы фæлхасгæнæгæн йæ бон раиртасын продукци контрафактон у, æви нæ уый.