Æгас цыртдзæвæнтæ

Цæгат Ирыстоны æппæты зæронддæр цы бæлæстæ ис, уыдон бæстонæй сбæрæг кодтой. Уый тыххæй нæ республикæмæ ссыдысты хъæды экспертизæйы Мæскуыйаг центр «Æнæниз хъæд»-ы специалисттæ. Уыдон æркастысты зæронд бæлæстæ цы уавæры сты, уымæ. Фыццаг сбæрæг кодтой, Хъахъхъæдуры цы зæронд тулдз бæлас ис, уый уавæр. Цæуы йыл 200 азы. Йæ бæрзæнд та у 23 метры. Цымыдисаг уый у, æмæ бæласы цъупп йæ бæрзæндæй уæрæхдæр у. Йæ уавæр у иттæг хорз. Æмбыд уидæгтæ æмæ йæм æндæр хъæндзинæдтæ нæ раиртæстой. Тулдз ахæм зæронд у, æмæ уынджы цы хæдзæрттæ ис, уыдонæй бирæтæ йæ уидæгтыл лæууынц. Специалисттæ ма бабæрæг кодтой Хъæдгæрон дæр. Уым та ис, 150 азы кæуыл цæуы, ахæс сусхъæд. Уæдæ Æрыдоны тулдз та зайы æнусы `рдæг. «Бæлæстæ – æгас æрдзы цыртдзæвæнтæ» зæгъгæ, программæмæ гæсгæ, ацы бæлæстæй алкæмæн дæр сæрмагонд номхыгъды байгом кæндзысты йæхи сыф. Программæйы сæйраг хæс у, æмбал кæмæн нæй, стыр историон æмæ æрдзон ахадындзинад кæмæн ис, уыцы зæронд бæлæстæ бахъахъхъæнын. Уымæй уæлдай ма бæласы хуызы цыртдзæвæн регионы туристон авналæнтæ дæр фылдæр кæндзæн.