Зæххастæу денджыз Цæгат Ирыстоны цæрджытæм фæхæстæгдæр. Сæ удæнцойдзинадæн фæзынд ног рейс Каирмæ. Египеты курортмæ бахауæн ис æртæ æмæ ‘рдæг сахатмæ.
Æппæтадæмон авиацион традици – ног борт хъуамæ ацæуа донæй конд аркæйы бын. Афтæ вæййы, ног маршрутыл рейсытæ куы фæзыны, уæд. Дзæуджыхъæуы аэропорты авиакомпани «Северный Ветер»-ы Аэробус æрбадт фыццаг хатт. Дыууæ сахаты фæстæ абалц кæндзæн Каирмæ.
Комкоммæ бастдзинад Каиримæ Цæгат Ирыстонæн раздæр никуы уыд. Билеттæ исынмæ адæм рады лæууынц. Ууыл дзурæг у, уæлдæфон науы Египетмæ уæгъд бынæттæ кæй нал ис, уый. Афтæмæй хæдтæхæджы ис бынат 220 бæлццонæн. Каирмæ ныр атæхæн уыдзæн алы цыппæрæмы дæр. Бынатмæ фæхæццæ уæвæн ис æртæ сахаты æмæ `рдæгмæ. Бортмӕ схызт канд Цæгат Ирыстоны цæрджытæ нæ, фæлæ ма æндæр регионтæй дæр.
Регистраци чи ацыд, уыцы сæдæйæм бæлццоны зæрдæ аэропорты кусджытæ балхæдтой зæрдылдарæн лæварæй. Уадз æмæ хорз æнкъарæнтимæ Цæгат Ирыстонæй йæ балц дарддæр акæна.
Дзæуджыхъæуæй ма ныр хæдтæхæгыл абалц кæнæн уыдзæн Ереван, Баку, æмæ Симферополмæ. Дыццæджы-иу хæдтæхджытæ абалц кæндзысты Ереван æмæ Симферополмæ. Бакумæ рейсытæ байгом уыдзысты 20 июнæй фæстæмæ, алы хуыцаубоны.
Ног рейсытæ снысан кæнын æмæ аэропорт ног æмвæзадмæ ракæнын бантыст республикæйы разамынды фæрцы.
Уымæй уæлдай ма ныр, къуыри иу хатт, алы майрæмбоны дæр Дзæуджыхъæуæй Мæскуымæ уыдзæн райсомы рейс. 9 сахаты æмæ 20 минутыл-иу «Нордвинд»-ы хæдтæхæг Ирыстонæй абалц кæндзæн Мæскуыйы аэропорт «Шереметьево»-мæ.