Æрыдон æмæ Беслæны бæрæг кæнынц электрон хызæгты уагдæтты куыст. Республикæйы сæргълæууæг Битарты Вячеславы хæслæвæрдмæ гæсгæ арæзт æрцыд сæрмагонд къамис.
Йæ хæс у «Россети Цæгат Кавказ»-ы хайад, Беслæн æмæ Æрыдоны территориалон компанитæ æмæ муниципалон куыстуæтты ‘хсæн æмархайд сбæрæг кæнын. Къамисы уæнгтæ сты бынæттон администраци, цæрæнуæтты коммуналон хæдзарад, артаг æмæ энергетикæйы министрады кусджытæ, «Россети Цæгат Кавказ»-ы æмæ дыууæ горæты электрон хызæгты куыстуæтты специалисттæ.
Эксперттæ сæрмагонд нымайæн приборты бæрæггæнæнтæм æркастысты. Уавæр сбæрæг кæнынæн курдиат бахастой уæлæмхасæн гæххæттытæм æркæсыны тыххæй. Къамисы куысты руаджы хъуамæ райхæлой электрон хызæгты компанитæ æмæ бынæттон администрациты ‘хсæн дзырддаг фарстатæ. Сæ куысты хатдзæгтæ къамисы уæнгтæ хæццæ кæндзысты Битарты Вячеславмæ.