Ацы кафт фæсивæдæн сæ зæрдæмæ цæуы йæ реквизит æмæ цырддзинады тыххæй. Алы фезмæлды дæр æхсызгон æнкъарæнтæ, суанг ма сæ хъæлæсы уагæй дæр æвдисынц æмæ афтæмæй кафт ноджы цымыдисагдæр рауайы. Æмткæй залы музыкæйы зæлтæм фæсивæд сæ курдиат æххæстæй æргом кæнынц, доулийы æмæ ирон фæндыры цагъдмæ сæ фæнды алыхуызон номыртæ цæттæ кæнын. Ансамбль “Барс”-ы сæдæ сывæллонæй фылдæр архайы. Ам æй алчидæр хорз зоны кавказаг кæфтытæ цæмæн равзæрста, уый. Иууылдæр сты ирон адæймаджы рæсугъд уды сконды, лæгдзинады æмæ æгъдæутты æвдисæнтæ.
Къорды стыр нысаниуæг ис хæлар ахастдзинæдтæн æмæ иудзинадæн. Уымæн, æмæ кафты рæстæг раст æмæ æмхуызон архайд аразгæ сты эмоционалон бастдзинадæй. Фæсивæд кæрæдзийы куы æмбарой, уæд архайын бирæ æнцондæр у. Ансамблы разамонæг Андрей Бахутов куыд радзырдта, афтæмæй арæх вæййы афтæ, æмæ сывæллон тагъд сахуыр вæййы кафын, алцы хорз фембары. Фæлæ сценæйыл йæ зонындзинæдтæ айрох кæны. Уæлдай æнкъарæнтæ фæиуварс кæнын æмæ æрмæст кафтыл хъуыды кæнын. Ууыл сахуыр кæнæн ис, зæгъы разамонæг.
Уыдон æмткæй райсгæйæ, æххуыс сты хорз бæрæггæнæнтæ равдисынæн. Къордмæ бирæ æнтыстдзинæдтæ ис. Зæгъæм, цалдæр мæйы размæ ансамбль фыццаг бынат райста националон культурæты æппæтуæрæсеон фæсивæдон фестивалы. Аивадуарзджытæн равдыстой æртæ номыры.
Ныридæгæн къорд дарддæр цæттæ кæны ног æркæстытæм. Фæнд кæнынц адæмы зæрдæтæм чи фæцæудзæн ахæм ног æмæ ирд кæфтытæ сæвæрын. Сæ бæстон архайды фæрцы та æнæмæнг æгас Уæрæсейы сæхицæн ном скæндзысты.
