Аспар хæцæнгарзимæ бырсы знаджы бынатмæ, йæ сæйраг нысан у бацахсын сæ зæххы хай. Лæппу ныхмæлæуды архайы цæрдæг. Цæттæ кæны тактикæ, йæ хæлæрттимæ тырны уæлахизмæ. Ахуыр сæ кæны тæссаг уавæрты хи раст дарын. Æппæт архайд цæуы дæсныйадæвдисæг ахуыр лазертагы фæлгæты.
Æндæр республикæтæй архайджытæн бынæттон культурæимæ баст ахуыртæ сæ зæрдæмæ уæлдай тынгдæр цæуынц. Фæсивæдæн сарæзтой ирон æвзаджы уроктæ. Сæ рæстæг куыд æрвитынц форумы, уый тыххæй ныффысдзысты фыстæджытæ сæ хиуæттæм, æрмæст иронау. Зонгæ ма сæ кæнынц националон кæфтытимæ. Мария ссыд Липецкæй. Ацы курс ын хорз фадат у ирон адæмы æгъдæуттæ хуыздæр базонæн.
Форумы программæ у хъæздыг æмæ алывæрсыг. Фæлæ йæ сæйраг нысан – профориентаци. Йæ ахсджиагдæр къабæзтæй та иу – педагогикæ. Фæсивæдæн аразынц алыхуызон лекцитæ, кусынц алывæрсыг райрæзтыл. Ацы мадзал хорз фадат у фæлтæрддзинад æмæ зонындзинæдтæй фæхай кæнынæн, æндæр регионтæй æмзонд хæлæртты ссарынæн.
Мадзал бацæттæ кодта “Грант первых”-ы уæлахиздзау Тобойты Надеждæ, ахуырады министрад, фæсивæды комитет æмæ Раззагдæрты змæлды æххуысæй. Форум æрбангом кодта 120 адæймаджы бæстæйы 6 регионæй. Архайджытæ райстой практикон зонындзинæдтæ, базонгæ сты бынæттон культурæимæ, фыццаг къахдзæфтæ акодтой фидæны дæсныйадмæ.
