«Иры Стыр Ныхас»-ы хъæппæрисæй байгом кодтой, ирон æвзаг чи нæ зоны, уыцы адæмæн ахуыртæ. Уыдон уыдысты алы кары ахуырдзаутæ. Ирон æвзаджы курсытæ кусын райдыдтой фарон. Ацы аз конд æрцыдысты æртыккаг хатт. Алкæмæн дæр сты лæвар, вæййынц къуыри дыууæ хатты, дыгай сахæтгай.
Аххæсдзысты фараст мæйы. Кусы дзы дыууæ къорды.
Будтуты Эльмирæ ирон æвзаджы курсыты тыххæй базыдтæ Интернеты тыгъдады, куыд зæгъы, афтæмæй ирон æвзаг ахуыр кæнын зын у, фæлæ йæ базонын та у ахсджиаг хъуыддаг.
Будтуты Эльмирæ, архайæг: «Хорз æмбарын дыгуронау, фæнды мæ иронау дзурын сахуыр кæнын, Дыгуронау æмбаргæ кæнын, дзургæ арæх нæ фæкæнын, уымæн æмæ мын ис уырыссаг акцент, фæлæ мæ иронау та фæнды сахуыр кæнын».
Аза Бакалова ирон æвзаг гыццылæй ахуыр кодта, фæлæ йæ бинонтæ Ирыстоны кæй нæ цардысты, уый тыххæй нал дзырдта иронау. Ныр ирон æвзаджы курсыты руаджы бындуронæй ахуыр кæндзæн ирон æвзаг.
Бакалова Аза, архайæг: «Гыццылæй цы ’взаг зыдтон, уый, кæй зæгъын æй хъæуы, ферох кодтон. Немæ иронау ничи дзырдта, скъолайы дæр нæ дзырдтам. Рох кæнын райдыдтон ме ’взаг. Уымæ гæсгæ мæ ныр бындуронæй ирон æвзаг хъæудзæн ахуыр кæнын».
«Иры Стыр Ныхас» кусы канд æгъдæуттæ хъахъхъæныны хъуыддагыл нæ, фæлæ ирон æвзаджы рæзтыл дæр. Уымæ гæсгæ, «Иры Стыр Ныхас»-ы сæрдар Кучиты Русланы ныхасмæ гæсгæ, аразынц æппæт дæр, цæмæй ахуыр кæныны фадат уа æрмæст ирон адæмæн нæ, фæлæ æндæр адæмыхæттытæн дæр, ирон æвзаг сахуыр кæнын кæй фæнды, уыдонæн. Уыимæ, ахуыр кæнынмæ æрбацæуæн ис цавæрфæнды кары адæмæн дæр.
Ирон æвзагыл сæ ахуыр кæнынц куырыхон ахуыргæнджытæ, Саламты Лидæ æмæ Къорнаты Зинæидæ сарæзтой чиныг фæсарæйнаг æвзаг ахуыр кæныны методикæмæ гæсгæ. Ис дзы фаг æрмæг лексикæ базонынæн, орфографи æмæ пунктуацийы æгъдæуттæ сахуыр кæнынæн.
Ныртæккæ цы ног адæм æрбацыд, уыдонмæ æнхъæлмæ кæсдзæн 9 мæйон курсытæ, къуыри дыууæ хатты сын зонындзинæдтæ дæтдзысты фæлтæрдджын ахуыргæнджытæ. «Иры Стыр Ныхас»-ы фæрцы ирон æвзаг сахуыр кæнын кæй фæнды, уыдонæн ис фадат лæвар, æнæ ’хцайы фæрæзтæй бындуронæй æвзаг базонын. Иронау чи райдайа дзурын, уыдонæн кадджын уавæры ратдзысты æвдисæндартæ.
Айларты Эмилия