Кæйдæр хъæуы хæрзхъæд мобилон интернет, чи дæр та йыл йæ къух ауигъы. Арæх вæййы афтæ æмæ республикæйы цæрджытæ нынныхмæ вæййынц мобилон бастдзинады станцæтæ æвæрынмæ. Уыцы хъуыддаджы ахсджиаг у адæмимæ ныхас кæнын æмæ сын бæстонæй сæ фæрстытæн дзуæппытæ дæттын. Фарстамæ се `ргом аздæхтой ме `мкусджытæ.
Адæмæй иутæ курынц бастдзинады хæрзхъæддзинад фæхуыздæр кæнын, иннæтæ уымæн цæлхдуртæ æвæрынц сæ тых, сæ бонæй. Сты ног антеннæтæ æмæ объектты арæзтады ныхмæ. Уымæн æмæ фæстаг рæстæг бирæтæ тæрсын райдыдтой бастдзинады инфраструктурæйы ногдзинæдтæй. Уыцы фарстайыл æрныхас кодтой информацион технологитæ æмæ бастдзинады регионалон управленийы.
Йæ разамонæг Сæлбиты Аланы хъуыдымæ гæсгæ, æхсæнады мæнг хъусынгæнинæгтæ кæй парахат кæнынц, уый у сæйраг аххосæг. Специалистты сæйраг хæс у адæмимæ ныхас кæнын. Бастдзинады инфраструктурæйы объекттæ закъоны бындурыл кæй æвæрынц, уый тыххæй. Фæстаг хатт бастдзинады цæджындз хъыгдард æрцыд Ирыхъæуы.
Горæтгæрон районы дæр адæм дыууæ дихы фесты. Иуты фæнды, цæмæй ног цæджындзтæ арæзт цæуой. Уымæн æмæ йæ зонынц, мобилон бастдзинад æмæ интернеты хæрзхъæддзинад хуыздæр кæй кæны уый фæрцы. Иннæтæ цæхгæр ныллæууыдысты. Уыдоны хъуыдымæ гæсгæ та, бастдзинады антеннæтæ æнæниздзинадыл ахадынц æвзæрырдæм.
Горæтгæрон районы администрацийы сæргълæууæджы хæдивæг Джиоты Вадим куыд фæнысан кодта, афтæмæй ахæм куыстыты тыххæй хъæуы рагагъоммæ фехъусын кæнын. Цæмæй районы хицауад куъылымпытимæ ма ‘мбæла æмæ адæмимæ рагацау бакуса. Афтæмæй Ирыхъæуы 92 адæймаджы бафыстой хъæуы хицауы номыл фыстæг. Ныхас дзы цæуы, бастдзинады станцæ саразын ма бауадзыныл. Адæмы курдиæттæм специалисттæ æнæмæнг се ‘ргом аздахдзысты.
Бастдзинады станцæты куыстмæ кæсы Уæрæсейы фæлхасгæнджытæм цæстдарды регионалон управлени. Объекты скусын кӕныны агъоммæ сбæрæг кæнынц, адæймагыл йæ электромагнитон уылæнтæ куыд ахадынц, уый. Уыимæ ма, специалисттæ хынцынц, чи кусы, уыцы объектты иумæйаг тӕваг.
Антеннæ сæвæрынц экспертты хатдæзгты фæстæ. Дарддæр дæр йӕ куысты дæргъы арæзт цæуынц æмбæлгæ иртæстытæ. Сæлбиты Алан фæбæрæг кодта, уыцы хуызы мæнг информаци бастдзинады объектты тыххæй цæмæй ма парахат кæна, уый тыххæй адæмы фарстатæн дзуапп дæттын хъæуы æххæстæй. Ведомство районы хицауадимæ баныхас кодтой, хъæуы цæрджытимæ кæй фембæлдзысты.
