Æвзонг Беркъаты Азæмæт æрвылбон фæсурокты атагъд кæны БМК-йы культурæйы хæдзармæ. Ам иннæ чызджытæ æмæ лæппутимæ архайы кафджыты къорды. Сæрмагонд агъуысты сын æппæт уавæртæ дæр скодтой. Бæрзонд æмæ райдзаст къултæ, ирд ахорæнтæ, фидар пъолтæ. Ахæм гæнæнтимæ сæм кафын дæр цæуы.
Культурæйы хæдзары фæзынд нырыккон хореографийы къорд дæр. Архайынц дзы 15 чызджы. Йæ разамонæг Сиукъаты Зазæйæн æхсызгон у сывæллæттæн ахæм уавæртæ кæй фæзынд æмæ сæ æндæр бынæттæм цæуын кæй нал хъæуы, уый.
Ацы бæстыхайы ивгъуыды нывтæ æнгом баст æрцыдысты нырыккон гæнæнтимæ. Кæддæры фсивæдон галуаныл цæуы 90 азы.
Рацарæзты рæстæг сæйрагдæр уыд истори бахъахъхъæнын. Культурæйы артдзæсты реконструкци райдыдта 2023-æм азы. Уый размæ 10 азы уыд афтид. Цард дзы бамынæг. Йæ сæр ныккалд, къултæ афаз сты. Объект бахауд Беслæны социалон-экономикон рæзты программæмæ. Кусджытæ сфидар кодтой бындур æмæ къултæ, баивтой цар æмæ коммуникацитæ, сæвæрдтой дуæрттæ æмæ рудзгуытæ. Цæрджыты хъуыдытæм æмæ мысинæгтæм гæсгæ бакодтой аивгæнæн куыстытæ. Культурæйы хæдзар ногæй кæй байгом, уый адæмæн сси æцæг бæрæгбон.
Культурæйы хæдзары ис чысыл концертон зал, хореографион зал, вокалон кълас, дала фæндыры секци, доулийы къорд. Сæрмагонд агъуыст дзы фæзынд нывгæнджытæн. Æмткæй дзы алы архайдæн дæр сарæзтой æмбæлгæ уавæртæ, сфæлдыстадон къордтæ æххæст сты музыкалон инструменттæй. Æппæт ахуыртæ та лæвар. Бынаты ма фæзынд хи музей дæр.
Къултыл алы заманты къамтæ. Хистæртæй дзы бирæтæ сæхи базонынц. Рæзгæ фæлтæрæн та сты хорз дæнцæг, ивгъуыдимæ бастдзинады фæрæз. Хæстæгдæр рæстæг ма культурæйы хæдзары фæзындзæн чиныгдон дæр. Ифтонггонд уыдзæн хъæугæ гæрзтæй. Кусæндоны специалисттæ архайынц рагон традицитæ сног кæнын, истори хъахъхъæнын, рæстæджы домæнтимæ æмдзу кæнын æмæ кæстæрты курдиат æргом кæныныл. Уый тыххæй сын ныр æппæт уавæртæ дæр ис.
