Куыстытæ сæ тæмæны бацыдысты, æххæст сæ кæнынц æнæрлæугæйæ. Ахуыры аз сæ æрыййæфта, æмæ уымæ гæсгæ архайд фæтагъддæр кодтой. Специалисттæн сæ къухы бирæ бантыст скæнын. Фыццаджыдæр уал хъæдын цæджындзтæ баивтой ногтæй сты бетонæй конд. Ауагътой æппæт коммуникацитæ, саив кодтой æддаг бакаст. Ныртæккæ ахорынц къултæ. Ауайæнты ма хъæуы плиткæ сæвæрын, кълæсты та линолеум. Кусджытæ куыд зæгъынц, афтæмæй бæстыхай уыд заууат, фыдбылызæй тæссаг уавæры, уымæ гæсгæ æппæт хъæндзинæдтæ снывыл кæнын æнцон нæ уыд.
Корпусы ахуыр кæнынц Дигорайы 2-æм скъолайы райдиан кълæсты ахуырдзаутæ. Куыстытæ кæронмæ нæ фесты, фæлæ ныртæккæ дæр бæстыхайы хуызæй зæрдæ райы. Сног дзы кодтой алы къуым дæр. Скъола сарæзтой 1856 азы æмæ уæдæй бындурон цалцæггонд никуы уыд. Уыцы рæстæгмæ æппæт коммуникацитæ æмæ цæджындзтæ заууатмæ æрцыдысты. Хуыздæр уавæры нæ уыдысты материалон-техникон бындуртæ дæр. Сабитæн самал кæндзысты ног компьтертæ æмæ интерактивон фæйнæджытæ.
Райдиан скъолайы корпусы бындурон цалцæг кæй цæуы, уый тыххæй 356 сывæллоны ахуыр кæнынц хистæркъласонтимæ сæйраг бæстыхайы. Рæстæгмæ сæ раивтой дыууæ фæлтæрмæ. Уый тыххæй къуылымпыдзинæдтæ ис, фæлæ ног цалцæджы цинæй фæсивæд ууыл дæр разы сты.
Специалисттæ рацарæзтмæ бавнæлдтой мартъийы райдиан. Куыстытæ хъуамæ фæуой 1-æм декабры. Архайд æнтыстджынæй кæй цæуы, уымæ гæсгæ бæстыхай срæвдз уыдзæн октябры кæрон. Афтæмæй, тагъд сабитæ æрбаздæхдзысты сæ ноггонд бæстыхаймæ.
