Дзæуджыхъæуы уынгты хæдтулгæты нымæц афæдзæй-афæдзмæ фылдæр кæны. Уый бæрæг у, фæндаггон цæндтæ æмæ фыдбылызтæ кæй сарæх сты, уымæй дæр. Уый тыххæй ныртæккæ ахсджиаг у светофрты нысаниуæг. Æрвылаз сæ куыст хуыздæрæй-хуыздæр кæны. Зæгъæм, ацы аз горæты администрацы раивдзæн æмæ сæвæрдзæн 5 ног светофоры.
Ацы ран æнцон ацæуæн нæу. Æмбæлынц Къостайы проспект æмæ Калинины уынг. Фæндæгтыл алырдæм дæр ис 4-6 рæнхъы. Боны дæргъы дзы ацæуы 30 мин хæдтулгæйæ фылдæр.
Ахсджиаг у, цæмæй ахæм рæтты хæдтулгæтæ цæуой æмбæрцæй æмæ ма цæндтæ ма ‘взæра. Уый тыххæй светофор кусы нысангонд программæмæ гæсгæ, фæндаджы алы хайæн дæр у сæрмагонд.
Дзæуджыхъæуы ныртæккæ ис 127 светофоры. Уыдонæй 30 светофоры ног хуызмæ нæма раивтой, æмæ кæм лæууынц, уым, шофырты ныхæстæм гæсгæ, зындæр ацæуæн у.
Ныртæккæ ахæм светофорты нымæц къаддæр кæны. Азæй-азмæ сæ ногтæй ивынц. Зæгъæм, ацы аз дзы раивдзысты 4. Уыдон уыдзысты Мамсыры-фырт æмæ Доваторы проспект, Гастелло æмæ Инæлар Плийы фырты номыл уынг, Мичурин æмæ Остаты фырты номыл, инæлар Хетæджы-фырт æмæ Кутузовы номыл цæхгæрмæ лæуд уынгты светофортæ. Гæздæнты æфсымæрты номыл уынг æмæ Къостайы проспект кæм æмбæлынц, уым та световор никуы уыд. Сæвæрдзысты дзы ацы аз. Уæвгæ та дзы, уавæрмæ гæсгæ, рагæй хъуыди, уымæн æмæ дзы хæдтулгæтæ дæр æмæ фистæг бæлццæттæ дæр бирæ вæййы. Фæлæ, цыфæнды электроникæ куыд у, афтæ светофорæн дæр арæх йæ куыст фæкъуылымпы вæййы. Æдасдзинады тыххæй хъæндзинæдтæ афойнадыл аиуварс кæнын хъæуы. Уыцы хъуыддаджы алкæмæндæр йæ бон у баххуыс кæнын.
Иуæй-иу стыр горæтты светофортæ кусынц иумæйаг системæмæ гæсгæ. Зæгъæм, Краснодары, Стъараполы, Череповецы та парахат у светофорты сæрмагонд куысты фæтк. Хуыйны «Зелёная волна», зæгъгæ.
Специалисттæ та радон хатт зæрдыл лæууын кæнынц, æдасдзинад, фыццаджыдæр, шофыртæй аразгæ кæй у. Æнæмæнг хъæуы фæндаггон æгъдæуттæ æххæст кæнын.
Дзæдзойты Фатимæ
