Æдæппæтæй дзы ис 200 экспонаты.
Рухстауæн куыстæн, сывæллæттæн йæ цард чи снывонд кодта, уыимæ ацы ном кад æмæ радимæ чи хæссы, уыдон гыццыл не сты. Нæ дарддæры æрмæджы хъайтар дæр ис се ‘хсæн.
Уыимæ ма сырхæфсæддонты дзауматæ, танктæ, хæдтæхджыты хуызтæ, хæстон къамтæ æмæ бирæ æндæр цымыдисаг æрмæг. Скъолайы æфсæддон намысы музейы фенæн ис Фыдыбæстæйы Стыр хæсты историйы æвдисæнтæ. Æдæппæтæй дзы ис 200 экспонаты.
Музейы экспонаттæ æмбырд кодтой 10 азы. Хъуыддагыл бацархайдтой куыд ахуыргæнджытæ, афтæ ахуырдзаутæ æмæ скъолайы рауагъдонтæ. Музей саразыны хъæппæрис разынд истори æмæ æхсæнадзонынады ахуыргæнæг Цæлыккаты Иринæмæ.
Йæ уарзон дæсныйадæн Цæлыккаты Иринæ снывонд кодта 30 азæй фылдæр. Йæхæдæг куыд зæгъы, афтæмæй, йын истори бауарзын кодта йæ фыд Туккаты Махарбег. Уый хæсты рæстæг куыста танктæ уадзыны заводы. Уымæ гæсгæ йæ зæрдæмæ хæстæг айста историйы æвирхъау замантæ, куыд граждайнаг, афтæ Фыдыбæстæйы Стыр хæстыты цаутæ.
Историйы уроктæ тынг уарзынц скъоладзаутæ, разæнгардæй сæм цæуынц. Ахуыртæ вæййынц лекциты хуызы. Уæдæ уроктæм уазджытæ дæр арæх æрбахонынц. Ирина бирæ азты дæргъы кæй кусы, уымæ гæсгæ йæ къухы бафтыд сæрмагондæй хи методикæ сфидар кæнын.
Алы урокмæ дæр сфæлдыстадон цæстæнгас кæй дары, уымæ гæсгæ дзы тынг фæбузныг сты йæ скъоладзаутæ. Уæдæ йын йе`мкусджытæ дæр стыр аргъ кæнынц. Цæлыккаты Иринæйæн йæ удуæлдай куыст бирæтæн у фæзминаг.
Æппынæдзух сывæллæтты уæлхъус уæвын, æвæллайгæйæ сæ æфтауын зонындзинæдтыл, уыимæ æгæрон уарзтæй уарзын равзæрст дæсныйад. Æппæт уыцы хъуыддæгтæй нывæст у Цæлыккаты Иринæйы фæллоййадон амонд.
