Дзæуджыхъæуы æрымысыдысты Цæгат Ирыстоны адæмон артист Цугкиты Солтаны ном

14.05.2021 20:29 10

Цугкиты Солтан 47-аздзыдӕй йӕ цардӕй ахицӕн. Театры йæ фæстаг фæлгонц — «Дуда», «Бæтæйы фырттæй» спектаклæй.


Сценæ — йæ цард æмæ йæ уд. Цæгат Ирыстоны адæмон артист Цугкиты Солтаны мысæн изæр бацæттæ кодтой Дыгурон театры артисттæ. Солтаны рухс ном ссардтой йæ аивады скъуыддзæгтæй æмæ æмдзæвгæтæй.


«Дон Карлос», «Фабрицио», «Жеронт», «Князь Вано», «Амран», «Фӕлвӕра» ӕмӕ бирӕ ӕндӕр фӕлгонцтӕ алыхуызон жанрты зæрдæмæхъаргæйæ равдыста Дыгурон театры ирд стъалы. Уыцы хъæздыг хыгъд, æнæмæнгæй, баххӕст кодтаид ног ӕнтыстытæй. Фæлæ, куыд фæзæгъынц, адзалӕн мадзал нӕй. Афæдзы размæ Цӕгат Ирыстоны адӕмон артист Цугкиты Солтан 47-аздзыдӕй йӕ цардӕй ахицӕн. Театры йæ фæстаг фæлгонц — «Дуда», «Бæтæйы фырттæй» спектаклæй.

Сценæ курдиатджын артистæн уыд йæ цард. Солтанæн йæ мысæн изæр дæр бацæттæ кодтой йæ уарзон бынаты. Йæ рухс ном ын ссардтой йæ хæлæрттæ æмæ æмкусджытæ. Зæрдæмæхъаргæ æдзӕвгӕтӕ æмæ йæ аивадæй скъуыддзæгтæ, йӕ царды хъӕлдзӕг ӕмӕ уӕззау хабӕрттӕ æнæцæссыг никæй ныууагътой.

Цугкиты Солтан кæд абон не ‘хсæн нал ис, уæддæр цы фæд ныууагъта ирон аивады, уый у æнæихсыйгæ. Йӕ фæлгонцтæ æмæ зарджытæ баззайдзысты æнустæм адæмы зæрдæты.

If you have found a spelling error, please, notify us by selecting that text and pressing Ctrl+Enter.