Абон республикæйы кадджын уавæры байгом кодтой «Фыдыбæстæ хъахъхъæнджыты» фонды филиал. Фонд арæзт æрцыд Владимир Путины уынаффæмæ гæсгæ. Ацы бынаты ныр алывæрсыг æххуыс исдзысты æрмæст сæрмагонд æфсæддон операцийы архайджытæ нæ, фæлæ æппæт хæстон ветерантæ дæр, стæй сæ бинонтæ. Зæгъын хъæуы уый, æмæ сæ бон æрбацæуын уыдзæн æппæт фарстаты фæдыл дæр – куыд медицинон, афтæ сæ социалон барты тыххæй дæр.
Сæрмагонд æфсæддон операцийы архайджытæн æххуысы фонд саразын æнæмæнг хъуыд. Ныр æфсæддонтæ æмæ сæ бинонтæ æмбæлгæ гæххæттытæ, медицинон, психологон æххуыс, санаторитæм путевкæтæ æмæ ма бирæ æндæр лæггæдтæ исдзысты иу бынаты.
Сæрмагонд æфсæддон операцийы архайджыты бинонтимæ кусдзæн специалистты къорд. Социалон координатортæ ныридæгæн ахуыртæ фесты æмæ цæттæ сты æххуыс кæнынмæ. Бирæтæн дзы сæ хиуæттæ сты ветерантæ. Зæгъæм, Темырты Аленæйæн сæрмагонд æфсæддон операцийы архайдта йе ‘фсымæр. Фæцæф ис, ныр æй хъæуы реабилитаци ацæуын. Фæлæ фарстайы фæдыл кæдæм бацæуа, уый нæ зыдта.
Фонд кусын райдайдзæн райсом. Абон æй кадджын уавæры байгом кодтой. Хицауады уæнгтæ æмæ дзы журналисттæ сарæзтой экскурси. «Фыдыбæстæ хъахъхъæнджыты» фонды филиалтæ ныр сты нæ бæстæйы æппæт субъектты дæр. Уыдон хъуамæ алы æмвæзады хицауады уæнгты æрбамгом кæной, цæмæй бынаты кусой æфсæддонтæ æмæ сæ хиуæттимæ.
Æххуыс сæ æнæмæнг кæй хъæуы, ууыл республикæйы сæргълæууæг Сергей Меняйлоимæ ныхас кодтой, райсом консультацимæ чи æрбацæудзæн, уыдон. Курдиӕттæ хъусынц, сæ саразыныл куыст дæр райдыдта. Уый та къухы бафтыд бæстæйы Президенты Указы фæстæ. Дыууæ мæйы размæ йæ бафыста, æмæ фонд ныридæгæн байгом.
Фонды æрмæст сæрмагонд æфсæддон операцийы архайджытæ æмæ сæ хиуæттæн не ххуыс кæндзысты, фæлæ алы азты хæстон ветерантæн. Хонгæ дæр æй уымæ гæсгæ скодтой «Фыдыбæстæ хъахъхъæнджытæ», зæгъгæ. Йæ девиз дæр æмбæлгæ: «Нæхиуæтты нæ уадзæм».
Биджелты Бертæ