Дзæуджыхъæуы сбæрæг кодтой æппæтадæмон фестиваль «Театральная весна»-йы уæлахиздзауты. Архайдтой дзы Цæгат æмæ Хуссар Ирыстоны адæмон æмæ хæдахуыр театралон къордтæ.
Фестиваль саразынц 2012-æм азæй республикæйы театралон архайджыты цæдисы хъæппæрисæй. Йæ хæс у театралон традицитæ хъахъхъæнын æмæ театралон къордты `хсæн сфæлдыстадон бастдзинæдтæ фидардæр кæнын. Жюрийы уæнгтæ федтой алы спектакль æмæ пьесæ дæр, равзæрстой дзы хуыздæртæ. Абон уæлахиздзауты схорзæхджын кодтой кады гæххæттытæ æмæ дипломтæй, радтой сын æхцайы премитæ. Дарддæр фестивалы архайджытæ сæ курдиат равдисдзысты республикæйы паддзахадон театрты сценæтыл.
Схорзæхджын ма кодтой инклюзивон театралон фестиваль «Шаг к успеху»-йы архайджыты дæр. Сæ куыстытæ дзы равдыстой Цæгат Ирыстон æмæ Уæрæсейы 16 инклюзивон сфæлдыстадон хæдахуыр къорды. Фестиваль ацыд фыццаг хатт, фæлæ хъуамæ суа æрвылазон.