Дзæуджыхъæуы дарддæр цæуы фæндæгты цалцæг. Егъау объекттæй иу у Æрыдойнаг уынг. Ног кæнынц 3 километры. Зилынц Абайты Васойы номыл уынгмæ дæр. Нывыл кæнынц бирæфатерон хæдзæртты кæртытæ дæр. Равзæртой сæ цæрджыты курдиæттæм гæсгæ. Æдæппæтæй сентябрьмæ сцалцæг кæндзысты 65 кæрты. Абоны онг цы бантыст уый тыххæй бæлвырддæр нæ дарддæры æрмæджы.
Кусджытæ тротуары уæлцъар цæттæ кæнынц асфальт сæвæрынмæ. Лæгъз кæнынц зæхх. Уыцы иу рæстæг ивынц дондзæуæн æмæ газы хæтæлтæ дæр. Æрыдойнаг уынджы фæндаг бындуронæй 2006 азæй цалцæггонд нæ уыд. Январы бавнæлдтой куыстытæм. Ныртæккæ ивынц Кольбусы уынгæй Мамсыраты Хаджумары номыл уынджы онг фæндаг.
Фæндагæн йæ уæрх нæ аивдзæн. Хæстæгдæр рæстæг райдайдзысты асфальт ног æвæрын. Æмткæй райсгæйæ, сцалцæг кæндзысты фæндаджы 3 километры. Цалцæг кæнынц Абайты Васойы номыл уынг дæр. Дыууæ къуырийы размæ райдыдтой исын фæндаджы раздæры уæлцъар. Сног æй кæндзысты ГЭС-ы хидæй æфсæддон «городоккы» онг.
Мæскуыйаг уынджы хæдзары кæрты тагъд фæзындзæн ног бандæттæ. Раивдзысты рухсдæттæн системæ дæр. Сифтонг кæндзысты хæдтулгæтæ ’вæрæн бынæттæ дæр. Хæдзары цæрджытæ уымæ рагæй æнхъæлмæ кастысты. Фæндаг къуыппытæ æмæ дзыхъхъытæй нал зынди.
Федералон программæ «Æдас æмæ хæрзхъæд фæндæгтæ»-йы руаджы Дзæуджыхъæуы ног кæнынц 21 уынджы фæндæгтæ. 14 -мæ зилынц æнцонвадат цардыуаджы программæйы фæлгæты. Аив кæнынц бирæфатерон хæдзæртты кæртытæ дæр. Æдæппæтæй ацы аз цалцæг кæнынц 65 кæрты. Ивынц къахвæндæгтæ, æрбацæуæнтæ. Куыстыты хæрзхъæддзинадмæ æппынæдзух кæсынц фæндаггон фонды специалисттæ.
Сентябрмæ фæткмæ гæсгæ цалцæггæнæн куыстытæ кæронмæ æрхæццæ уыдзысты. Ныр та уал горæты цæрджытæм сидынц, цæмæй рæстæгмæ къуылымпыдзинæдтæн бабыхсой.