Санкциты уавæрты чысыл æмæ астæуккаг амалхъомадæн æххуысы мадзæлттыл ныхас цыд Оперативон штабы æмбырды. Амыдта йæ премьер Дзанайты Барис. Экономикон райрæзты министр Кучиты Зауыр радзырдта, фæстаг азты фылдæр паддзахадон æххуыс кæй ис, уый тыххæй. Кæд 2021-æм азы 87 куыстуаты æфстау æхцайы фæрæзтæ райстой 106 милуан сомæн, уæд фарон та ахæм хуызы æххусæй спайда кодтой чысыл æмæ астæуккаг бизнесы 283 субъекты 261 милуан сомæн.
Уымæй уæлдай ма алыхуызон æххуыс райсæн ис центр «Мой бизнес»-ы дæр. Йæ бындурыл кусынц микрофинансон æмæ кредитон гарантиты фондтæ, экспортон центр æмæ райрæзты æндæр институттæ. Специалисттæ дæттынц консультацитæ, æххуыс кæнынц бизнес-пълан аразгæйæ, æндæр хъуыддæгты. Æппæт ацы фæрæзтæ хорзы ‘рдæм фæзындысты, хи куыстуæттæ чи байгом кодта, уыцы адæмы нымæцы рæзтыл. Ныртæккæ сты 16 минæй фылдæр. Цæгат Ирыстон та Уæрæсейы регионты ‘хсæн ис раззагдæртимæ ацы бæрæггæнæны.