Фæстаг азты республикæйы егъау проекттæй иу – курорт “Мамысон” байгом кæндзысты 28-æм феваралы

Фæстаг азты республикæйы егъау проекттæй иу – курорт “Мамысон” байгом кæндзысты 28-æм феваралы. Уый тыххæй фехъусын кодтой хицауады сæрдар Дзанайты Барис æмæ “Кавказ.РФ”-ы генералон директор Андрей Юмшановы кусæг фембæлды рæстæг. Программæйы – ирон чъириты фестиваль, артистты æмæ сфæлдыстадон къордты архайд. Кадджын уавæры ма байгом кæндзысты дыууæ рæтæнывæндаджы, стæй къахдзоныгътыл бырæн трассæ. Мадзалмæ хонынц кæй фæнды, уыдон се ‘ппæты дæр. Республикæйы цæрджыты æмæ уазджыты Мамысоны онг хæццæ кæндзысты траспортыл. Райсомы 9 сахатыл Ирон театры цурæй цæудзысты автобустæ. Уæ зæрдыл уын æрлæууын кæндзыстæм, “Мамысон”-ы арæзтад райдыдта 2022-æм азы. Фæзынд дзы нырыккон инфраструктурæ Уæрæсейы уагъд хъæугæ кусæнгæрзтимæ, инженерон хызæгтæ æмæ туристон объекттæ. Бынаты ис дыууæ ауындзгæ фæндаджы. Иу дзы адæмы ласдзæн 3 мин метры бæрзæндмæ. Иннæйы руаджы та цъуппæй æрцæуæн ис фæлладуадзæн бынаты дæллаг станцæмæ. Ныридæгæн ма дзы цæттæ сты къахдзоныгтыл бырæн трассæты 14 километры.