Низ рабæрæг кæнын, реабилитацийы курс ацæуын, хæрзхъæд медицинон æххуыс райсын. Республикæйы байгом Карджын адӕмы низтӕ дзӕбӕхгӕнӕн центр. Кусæндон сифтонг кодтой æппæт хъæугæ кусæнгæрзтæй. Сарæзтой дзы æмбæлгæ уавæртæ афоныл дзæбæх кæнын райдайынæн. Куыстытæ куыд æххæстгонд æрцыдысты, уый федта æнæниздзинад хъахъхъæныны министр Тебиаты Сослан.
Карджын адӕмыл фылдæр хатт низтæ стых вæййынц. Се ‘нæниздзинадыл сын хъæуы узæлын. Сæрмагонд дзӕбӕхгӕнӕн центры пациенттæ арæхдæр вæййынц, 60 азæй фылдæр кæуыл цæуы æмæ æппынæдзух низджын чи у, ахæмтæ. Специалистты æркаст сын æнæмæнг хъæугӕ у. Ныр сын ахæм фадат фæцис.
Центр байгом кодтой национ проект «Демографи» æмæ регионалон проект «Хистæр фæлтæр»-ы фæлгæты. Ам ис 25 бынаты. Дзæбæхгæнæн хайæдтæ сифтонг кодтой æппæт хъæугæ кусæнгæрзтæй. Хæрзхъæд медицинон æххуысæн дзы æппæт æмбæлгæ гæнæнтæ дæр ис. Уавæртæ федта республикæйы æнæниздзинад хъахъхъæнынады министр Тебиаты Сослан. Аныхас кодта пациенттимæ дæр.
Центр лæггад кæндзæн республикæйы æппæт районтæн. Йæ кусджытæ æппынæдзух æмгуыст кæнынц иннæ специалисттимæ.
Карджын адӕмы низтӕ дзӕбӕх кӕныны центры сæйраг нысан – хистæрты цард фæхуыздæр кæнын. Сæ æнæниздзинадмæ сын æппынæдзух хъæуы æргом ‘здахын. Районы поликлиникæты бындурыл сараздзысты реабилитацийы æмæ дзæбæхгæнæн физкультурæйы хайæдтæ. Терапийы лæггæдтæ бакæныны фæдыл самал кæндзысты æмбæлгæ кусæнгæрзтæ. Уыимæ ма æмархайд кæндзысты республикæйы социалон службæтимæ.