Мæйы дæргъы Горæтгæрон районы æмæ Алагиры рынчындæтты республикæйы цæрджытæн медицинон æххуыс кæнынц алыхуызон профильтæм гæсгæ. Къуыри цыппар боны рад хæссы Горæтгæрон районы рынчындон. Æвæстиатæй пациентты исынц хирургийæ, гинекологи æмæ терапийæйы хайæдтæм. Алагиры æххуыс кæнынц инфекцион æмæ терапийæйы низтимæ рынчынтæн.
Горæтгæрон районы рынчындон ныртæккæ пацинетты исы республикæйы алы районæй дæр. Уымæн аххосаг коронавирусы инфекци. Кæд медицинон кусджытæн зын у, уæддæр рынчынтæн лæггад кæныныл æххæсынц. Бахъуаджы рæстæг COVID-пациенттæн æххуыс кæнынмæ дзæбæхгæнæндон раздæхынмæ цæттæ у.
Ныртæккæ сæйраг рынчындоны бындурыл кусы поликлиникæ дæр. Къуындæг палатæтæй кабинæттæ цы уатты скодтой, уым дохтыртæ медицинон æххуыс кæнынц пациенттæй се ‘ппæтæн дæр. Къуылымпыдзинæдтæ ӕййафынц куыд цæрджытæ, афтæ медицинон персонал дæр.
Иннæ аз цæрджытæ медицинон лæггæдтæ исдзысты бындурон цалцæггонд поликлиникæйы. Ныртæккæ бæстыхайæн ивынц йæ сæр. Уыимæ ма дзы æххæст кæнынц мидæггаг куыстытæ дæр. Медицинон кусæндоны цы цыппар лифты уыд, уыдонæй сарæзтой дыууæ уæззæуттӕ ласæнтæ. Цæудзæн дзы медицинон каталкæ.
Поликлинкæ рацарæзт райдыдта фарон «Цæгат Кавказы федералон зылды райрæзты» федералон программæйы фæлгæты. Нысангонд фæткмæ гæсгæ æппæт куыстытæ дæр фæуыдзысты ацы аз декабры.
Рад хæссынæн уæлæмхасæн бонтæ ма райста Алагиры районы сæйраг рынчындон. Цыппæрæмы медицинон куыстуат исы терапийæйы хайады пациентты, иннæ бонты та – инфекцион низтимæ. Пациентты исынц алы бон дæр.
Хæстæгдæр бонты Алагиры рынчындоны бындурон цалцæджы фæстæ байгом уыдзæн ПЦР лаборатори. Специалистты ныхæстæм гæсгæ æххуыс уыдзæн æгас республикæйæн дæр. Объекты ифтонггонд уыдзæн æппæт хъæугæ кусæнгæрзтæй.
Ахæм фæткмæ гæсгæ республикæйы медицинон кусæндæттæ дарддæр кусдзысты. Сæйрагдæр у афойнадыл æмбæлгæ æххуыс алы пациентæн дæр бакæнын.
