Ам хистæр кары адæм сæвæрынц спектакльтæ æмæ равдыстытæ. Сæ сурæттæ раст равдисыныл зæрдæргъæвдæй фæкусынц. Иудзырдæй сæ æнкъард кæнынмæ иу минут дæр не `вдæлы. Сæ бон куыд æрвитынц, стæй хæдзары цы уавæрты цæрынц, уый базыдта нæ уацхæссæг Хуасдзауты Алинæ. Чысыл раздæр уын зæрдæ куыд бавæрдтам, афтæ та йын йæ иннæ æрмæг дæр уæ размæ хæссæм.
Быгъуылты Валя, зæгъæн ис, æмæ ацы хæдзары у, æппæты фылдæр дзы чи цæры, уыдонæй иу. Йæ хъысмæт ын æнцон схонæн зынтæй ис. Фыдæбæттæ `взарын райдыдта йæ сабибонтæй фæстæмæ. 5 азы йыл куы цыд, уæд уæззау низæй фæрынчын.
Йæ бинонты уавæр дæр бæллиццæгтæй нæ уыд. 21 азы йеддæмæ йыл нæ цыди, ардæм куы рбафтыди, уæд. Куыд зæгъы, афтæмæй йæ хуыздæр бонæрвитæнтæ ралæууыдысты, «Узæлд»-ы цæрын куы райдыдта, уæд.
Ацы хæдзары алы цæрæгæн дæр йæ хъысмæт у цымыдисаг. Фæлæ дзы ам алчидæр банкъардта уды хъарм æмæ æмбæлгæ узæлд. Сæ бонтæ иу ран бадгæйæ не `рвитынц. Æппынæдзух исты архайынц. Аразынц сын алыхуызон психологон тренингтæ æмæ ахуыртæ. Цæмæй сæ зæрдæйы ахаст рухсдæр уа. Хæдзарæн ис йæхи инклюзивон театр дæр. Артисттæ зæрдæргъæвдæй архайынц сæ сурæттыл. Ныридæгæн æнтыстджынæй сæвæрдтой цалдæр спектаклы сæ аивадон разамонæгимæ. «Волшебник изумрудного города» æмæ «Колобок». Равдыстой сæ сабитæн. Ныр та æвæрынц Чеховы «Свадьба».
Иуварсæй сæм куы кæсай, уæд адæймагæй ферох вæййы, ацæргæ адæм кæй сты, уый. Афтæ зæрдæмæхъаргæ у сæ архайд. Сæ аивадон разамонæг дæр сæ куысты хатдзæгтæй тынг разы у.
Уымæй уæлдай ма сæхи къухтæй аразынц алыхуызон цымыдисаг дзаумæттæ, хъазæнтæ. Уæдæ зарынмæ куыд дæсны сты, уый дæр куы фениккат! Ам сын суанг сæхи къорд дæр ис. Фарон сыл сæххæст 20 азы. Юбилейы кадæн йæ архайджытæ ныффыстой зарæг. Арæх се сфæлдыстадон æнтыстытимæ фæархайынц алыхуызон æркастыты. Сæ рæсугъд зарджытæм хъусгæйæ адæймаджы зæрдæ барухс вæййы.
Хæдзарæн йæ корпустæй иу федералон программæмæ гæсгæ Битарты Вячеславы хъæппæрисæй бындуронæй сцалцæг кодтой. Куыстытæ кæронмæ фесты хæрзæрæджы. Æппæт цæрджыты дæр бафарстой æмæ кæй фæндыд, уыдоны цалцæггонд бæстыхаймæ раивтой. Алы палатæйы дæр ис æппæт хъæугæ уавæртæ. Фæзынд сæм æртæ ног хайады. Сарæзтой зымæгон цæхæрадон. Дидинджытæм удуæлдайæ зилынц хæдзары цæрджытæ. Фæзынд дзы массаж æмæ дзæбæхгæнæн физкультурæйы кабинеттæ дæр.
Ничи баивдзæн ацы адæмæн хион æмæ тугхæстæг адæймаджы. Ацы хæдзар «Узæлд»-ы уыцы хæс сæхимæ райстой. Æмæ кæд фыццæгты бынат бацахсынмæ нæ тырнынц, уæддæр архайынц, цæмæй се `вджид цы адæм ис, уыдон мацæмæй цух уой.
Хуасдзуаты Алинæ
