Хъармгæнæн рæстæг Цæгат Ирыстоны фæуыдзæн райсом. Уый тыххæй аппаратон æмбырды фехъусын кодтта цæрæнуатон-коммуналон хæдзарад, артаг æмæ энергетикæйы министр Таматы Майрæн. Боныхъæды прогнозмæ гæсгæ, хæстæг рæстæг температурæ нæ фæныллæгдæр уыдзæн. Хъармгæнæнтæ ахуыссын кæныны графиктæ нысангонд æрцæудзысты муниципалитеттимæ. Фæхуыздæр эпидемиологон уавæр. Улæфæнты низтæ кæмæ рабæрæг вæййы, уыдоны нымæц къаддæр кæны ныр цыппæрæм къуыри. Коронавирусæй рынчынтæ та фæстаг рæстæг уæвгæ дæр нæ рабæрæг.
Сывæллæтты рæвдауæндæттæ æмæ скъолатæ иууылдæр сты гом. Ныхас цыд къæвдайы дон æмбырдгæнæн хæтæлтыл дæр. Доны кустуаты разамонæг Хъараты Тимуры ныхасмæ гæсгæ, фарста аиуварс кодтой Дзусы-фырты, Цæлыккаты Хъантемыры, Марковы, Московская, Морских пехотинцев уынгтыл æмæ Архонкæмæ фæзилæны. Егъау мадзæлттæ бахъæудзæн Сабырдзинады проспекты, Южныйы æмæ Хольцманы. Хицæнæй æрдзырдтой ахсджиаг объектты цалцæгыл. Куыстытæ æххæст кæныны æмгъуыдмæ Дзанайты Барис бабар кодта бæстонæй кæсын.
