Згъорæг Иван Давыдов райдыдта йæ радон дугъ. Схуыдта йæ «Кавказская тропа». 45 бонмæ фæнд кæны Цæгат Кавказы иу кæронæй иннæ кæронмæ азгъорын. Уый у мин километрæй фылдæр. Ныртæккæ ис Ирыстоны. Уыд Хохы Санибайы, Дæргъæвсы, Уæллаг Фыййагдоны, Дæллаг Уыналы æмæ Махческы. Йæ дарддæры фæндтæ æмæ æнкъарæнтæ радзырдта ме ‘мкусджытæн.
Дербентæй Сочимæ, Хъаспийы денджызæй Сау денджызмæ. 1200 километры æгас Цæгат Кавказы уылты. Омскæй рацæуæг спортсмен Иван Давыдов йæ базгъорд «Кавказская тропа» райдыдта 2 сентябры. Фæндаджы анывæзтæн ис сæрмагонд фæтк. Дисы æфтауы дистанци дæр — бонмæ 35 километры. Йæ фылдæр хай у хæхты уылты. Кæм уырдыг, кæм хæрд. Арæх ивы боныхъæд. Фæлæ уæддæр Иваны зæрдæмæ уазæгуарзаг Кавказ тынг фæцыд. Суанг ма цалдæр ран афæстиат хъæугæ æмгъуыдæй фылдæр. Ныр 20 бонмæ азгъордта 600 километры бæрц. Дугъгæнæг Ирыстоны йæ фæллад суадздзæн æмæ дарддæр йæ балц акæндзæн.
Иваны ныхæстæм гæсгæ, марафон у спорт æмæ æнæниз цардыуаджы æвдисæн. Згъорæджы ма фæнды Кавказы туристон балцвæдмæ фылдæр æргом раздахын. Фæлæ сæйрагдæр у хæрзаудæн архайд.
Иванæн ацы марафон у æхсæзæм. Раздæр ма архайдта Таджикистан, Киргизи æмæ Сыбыры дугъты. Цы-иу федта, уый-иу раргом кодта уацфысты хуызы. Фыста, ног бынæтты цы адæмыхæттытæ цæры, уыдоны культурæ æмæ традициты тыххæй. Иу регионæй иннæ регионмæ балцгæнгæйæ, Иваны дисы æфтауы алы адæмы менталитет, темперамент æмæ националон колорит. Уæдæ æрдзы нывтæ дæр зæрдæ агайынц.
