Къæсæрæй куыддæр бахизай, афтæ цыма ивгъуыдмӕ бакъахдзӕф кодтай. Рагон сахат, йӕ фарсмӕ ретро фотоаппарат. Ам ирдӕй ӕвдыст у бирӕ ӕнусты истори. Константин Каниди бӕллыд археолог кӕнӕ палеонтолог суӕвынмӕ. Куыдфӕстагмæ йæ монцæй сырӕзт ӕцӕг музей мин экспонатимӕ.
Бирӕтӕм диссаг кӕсы ахӕм рӕдаудзинад. Зынаргъ антиквариаты тыххӕй коллекционертӕ цӕттӕ сты хорз бафидынмӕ. Фӕлӕ алцы ӕхцайӕ ссаргæ нæу. Адӕм зæрдиагæй баххӕст кӕнынц скъола-интернаты музейы фонд ӕмӕ сын ӕхсызгон вӕййы экспонаттӕн дыккаг цард раттын.
Интернат хæссы Константины фыд Иван Канидийы ном — сывæллæтты сӕрыл йӕ цард чи радта, уыцы ахуыргӕнӕг. Йе сгуыхтдзинад ын 2004-ӕм азы сентябры базыдта ӕгас дуне. Йæ ном цæры ацы музейы дæр.
Цымыдисаг экспонаттӕй иу у 1964 азы скъапп. ХХ ӕнусы Цӕгат Ирыстоны цӕрӕг бетъырбухаг зодчийы рамбылдта азартон хъазтæй. Йӕ хӕс бафидынӕн ӕм ӕхца нал баззад ӕмӕ сфӕнд кодта йӕ хӕзнатӕй раттын. Ныртӕккӕ йын йæ мидӕг ӕфснайдӕй дарынц рагон цардыуаджы дзауматӕ.
Ам та — зӕронд магнитофонтӕ, радиоприемниктӕ, суанг ма дзы мыхуыргӕнӕн машинкӕтӕ дӕр ис. Экспонатты иу хай абон дӕр кусы. Ахсджиаг у уыдоныл ауӕрдын. Хицӕн къуымы — ирон адӕмы цардыуаджы предметтӕ. Къонайы рӕхысӕн уæлдай нысаниуæг ис нӕ культурӕ ӕмӕ традициты. Ацы бандон та Константинæн йæхицæн у уӕлдай зынаргъдӕр.
Скъоладзаутæ иттӕг хорз зонынц музейы истори ӕмӕ ӕппӕт экспонаттӕ дӕр. Сӕхи бон дӕр у уазджытӕн экскурситӕ кӕнын. Ӕдӕппӕтӕй интернаты ис 300 ахуыргæнинаджы бӕрц. Архайынц спортæй ӕмӕ хӕстӕгдӕр зонгӕ кӕнынц нæ культурӕимӕ.
Лӕваргæнджытæн сæ фылдӕр ацӕргӕ адӕм сты. Уымӕ гӕсгӕ экспонаттӕм арӕх цӕуын бахъæуы. Константин уырны, музей рӕзгӕ фӕлтӕры кӕй хъӕуы, уый. Фӕсивӕд хъуамӕ зоной ӕмӕ аргъ кӕной нæ историйӕн.
Æлыгæй куысты ӕрмадзы та Константин аразы дурынтӕ ӕмӕ бӕгӕныйы къустæ. Директоры фӕнды скъолайы музеймæ туристты сцымыдис кӕнын. Мастер-класстӕ дӕттын, экскурситӕ аразын ӕмӕ уазджыты Ирыстоны бирӕӕнусон культурӕимӕ зонгӕ кӕнын.
