Кæрæдзимæ “чызджытæ” æмæ “лæппутæ” дзурынц, раст цыма скъола 50 азы размæ нæ фесты каст, фæлæ хистæркъласонтæ сты. Сæрыхъуын фæхалас, фæлæ уæддæр уыцы æрыгон æмæ хъæлдзæг фæсивæд сты. Ахуырдоны ныры фæлтæр æмзондæй загътой — æнусы ‘рдæджы размæ скъолайæ чи акъахдзæф кодта, уыцы чызджытæ æмæ лæппуты къухты айзæлæд ахуыры азы фыццаг дзæнгæрæг.
Хуымæллæджы ног скъолайæн — йæ фыццаг рауагъдонтæ сты. Раст цыма 50 азы дæр нæ рацыд, уыйау лыстæг дзурынц се скъолайы бонты мысинæгтæ фæсивæдæн.
Мысинæгты хицæн бынат — ахуыргæнджытæн. Уыдонæн сæ алы зондджын ныхас дæр æмкъласонты зæрдæты баззад.
Уарзон скъолайæн скодтой зæрдылдарæн лæвар — хæххон хъæуы ныв, йæ къуымы — сæхи хуызистытæ. Фыццагкъласонтæн та æрбахастой адджын чыргъæдтæ. Абон Хуымæллæджы скъолайы ис 300 ахуыргæнинагæй фылдæр.
Æмæ ахуыры азы фыццаг цинвæлыст боны сæйраг архайджытæ дæр фыццагкъласонтæ сты кæддæриддæр.
Ацы сабитæн скъола дыккаг райгуырæн хæдзар кæй суыдзæн, ууыл хистæркъласонтæ дызæрдыг дæр нæ кæнынц. Се ‘мкъласонтимæ иу бинонты сывæллæттæй уæлдай не сты. Ныр сæ уырны, сæ хæлардзинад сын дæсгай азты сæрты кæй ахæсдзысты уыдон дæр.
Æрбацæудзысты. Æнæферохгæнгæ сабибонтæ æрымысынмæ, кæрæдзийыл ацин кæнынмæ. Царды цалх размæ тулы æмæ æрыгон бонтæн раздахæн нæй, фæлæ фарн æмæ æнæниздзинадæй зæрдæрухс уæнт уарзон æмкъласон лæппутæ æмæ чызджытæ.
