Дзæуджыхъæуы базарадон-экономикон техникумы студенткæ Карина Ильясова сси 8-æм национ чемпионат «Молодые профессионалы»-ы уæлахиздзау. 17-аздзыд чызг ирон чъиритæ кæнынæй нымад æрцыд хуыздæрыл. Конкурсы архайдтой Уæрæсейы 11 регионæй. Уæлахиздзаутæ æмæ, дыккаг бынæттæ чи бацахста, уыдон уыдысты Цæгат Ирыстонæй.
Карина Ильясова – Дзæуджыхъæуы базарадон-экономикон техникумы студенткæ. Нæ республикæмæ ахуыр кæнынмæ æрцыди Стъараполæй. Гыццылæй фæстæмæ хæринаг кæнынмæ тынг зæрдæргъæвд уыд. Фæлæ ирон чъиритæ скæнын фыццаг хатт бафæлвæрдта ацы техникумы.
Карина Ильясова, уæлахиздзау: «Мæн рагæй фæндыд дæсны хæринаггæнæг суæвын. Дзæуджыхъæуы ахæм техникум кæй ис, уый базонгæйæ, сфæнд кодтон ардæм ахуыр кæнынмæ æрбацæуын. Лабораторон куыстыты рæстæг нын загътой, чемпионат «Worldskills»-ы бацархайыны фадат нын кæй ис, уый. Æмæ мæ бафæндыд мæхи бафæлварын».
Карина кæд ирон чызг нæу, уæддæр чъиритæ кæнын тагъд сахуыр. Уымæ гæсгæ йæ бафæдыд конкурсы бацархайын дæр. Конкурсы сæйраг домæнтæм гæсгæ, чъирийы уæз хъуамæ уыдаид 850 граммы, йæ диаметр та 33 сантиметры. Æрыгон чызг æнæ аиппытæй сæххæст кодта конкурсы домæнтæ.
Карина Ильясова, уæлахиздзау: «Фыццаг бон кодтам æртæдзыхон чъиритæ æмæ насджынтæ, дыккаг бон – фыдджынтæ æмæ фæткъуыджынтæ, æртыккаг бон та – цæхæраджынтæ, картофджынтæ æмæ балджынтæ. Цы чъиритæ скодтон, уыдон иуылдæр конкурсы æппæт домæнтæн дзуапп лæвæрдтой».
Каринæйы ахуыргæнæг Тедеты Жаннæ йæ зонындзинæдтæ æнæвгъауæй лæвар кæны студенттæн. Хæринаг кæныны сусæгдзинæдтæ æрыгон чызг базыдта уымæ гæсгæ. Цымыдисаг ын уыд ирон хæринæгтæ цæттæ кæнын. Йæ ахуыргæнæг куыд бафиппайда, афтæмæй Каринæ тынг тырныдта ирон æгъдæуттæ базонынмæ дæр.
Чемпионаты бацархайдтой Уæрæсейы 11 регионæй, 16 азæй 22 азы онг кæуыл цæуы, ахæм студенттæ. Цæгат Ирыстонæй дзы уыди 15 адæймаджы. Призы аккаг чи сси, уыдон иуылдæр сты нæ республикæйы минæвæрттæ. Мадзалы сæйрагдæр нысан у – фæсивæды зонындзинæдтæм тырнынмæ разæнгард кæнын.
Дзæдзойты Фатимæ