Цымæ цы ис рæсугъддæр ирон уæздан кафтæй? Чызджыты уæнгты рог змæлд, æвзонг лæппуты къахфындзтыл кафтæй зæрдæ райы. Кировы районы адæмон кæфтыты ансамбль «Елхот» фестиваль «Иры фарн»-ы бацахста раззагдæр бынат. Уый фæрцы сæ къухы бафтыд ног костюмтæ бахуыйын. Ансамблæн уый стыр æххуыс у.
Æвæццæгæн, ахæм чызг æмæ лæппу нæ разындзæн, сценæйыл кафты бацæуын кæй нæ бафæнда. Раст гуырæвæрд æмæ аив цæнгты змæлдæй кафт фидыцджындæр скæнын.
Тотыккаты Аминæ дæр рагæй бæллыд аивады хи бафæлварынмæ. Елхотты культурæйы хæдзары къæсæрæй куы бакъахдзæф кодта, уæд уайтагъд банкъардта аивады æгæрон тых. Йæхи иттæг хорз равдыста æмæ цыбыр рæстæгмæ раззагдæр къорды архайын райдыдта. Бирæ адæмыхæттыты кæфтытæ зоны, фæлæ йæ зæрдæ нæ ивы ирон симд æмæ хонгæйыл.
Ансамбль «Елхот» сæвзæрд 70-æм азты. Йæ фыццаг разамонæг уыд Тедеты Руслан, адæмон ансамблы ном дæр райстой йемæ 1982 азы æмæ йæ схуыдтой «Бæркад». Фæстæдæр ын разамонæг сси Ходы Хазби. Ансамблы ном ногæй ивд æрцыд. Схуыдтой йæ, раздæрау, «Елхот». Уый фæстæ ансамблæн разамынд лæвæрдта æрыгон, фæлæ курдиатджын кафæг Дудайты Давид. Зæгъæн ис, æмæ уый дæр йæ фыццаг къахдзæфтæ райдыдта ам. Каст фæцис аивæдты колледж. Кафыд паддзахадон ансамбль «Алан»-ы. Фæстæдæр йæ уарзон ансамблмæ æрыздæхт. Ныр авд азы дæргъы кусы ам. Ансамблы архайы 150 адæймаджы. Дих кæнынц цалдæр къордыл. Раззагдæры ис 42 адæймаджы. Раздæрау архайынц алыхуызон регионалон, уæрæсеон æмæ æхсæнадæмон æркастыты æмæ фестивальты, æвдисынц алы адæмы хæттыты кæфтытæ. Алы ран дæр сын тыхджын къухæмдзæгъдæй «æгас цæуай» фæзæгъынц, сæ курдиатæн сын аргъ скæнынц. Уыимæ сæм фидæнмæ нысæнттæ дæр ис.
Рæсугъд кафтæй бирæ аивадуарзджытæн сæ зæрдæтæ чи балхæдта, уыдонæн сæ гæнæнтæ ныр фестиваль «Иры фарн»-ы фæрцы фæуæрæхдæр сты. Уыдоны ’хсæн Кировы районы адæмон кæфтыты ансамбль «Елхот»-ы архайджытæ дæр. Рамбылдтой грант. Ансамбль куы фæзынд, уæдæй абонмæ сæ кафæн уæлæдарæс ивд нæ уыд. Ныр ацы æхцайы фæрæзты фæрцы къухы бафтыд 42 костюмы бахуыйын.
Кæддæр-иу Кодзырты Хъазыбег дæр ацы æвзонг лæппуты хуызæн сæрбæрзондæй ракъахдзæф кодта сценæмæ. Уыд Елхоты фыццаг кафджыты къорды архайæг. Иу фæлтæр иннæйы ивы, ивынц цæсгæмттæ, æндæр сты авналæтæ дæр. Фæлæ сæм Хъазыбег ныр дæр кæсы, æмæ йæ зæрдæйы гуыры алыхуызон рæсугъд æнкъарæнтæ.
Тагъд рæстæджы ансамбль бæрæг кæндзæн йæ 40 азы юбилей. Уымæ гæсгæ сæм ныр цы ногдзинæдтæ фæзынд, уыдон сын сæ циныл уæлдай цин æфтауынц. Ныр æрмæст кафтæй нæ, фæлæ уæлæдарæсæй дæр ссардзысты адæмы зæрдæтæм фæндаг. Фæнд кæнынц æрхонын кадджын уазджыты, саразын кафты æцæг бæрæгбон.
