2024-æм азы контролон-цæстдарæн куысты хатдзæгтæ, уыимæ ацы азмæ нысæнттыл ныхас цыд хицауады æмбырды. Амыдта йæ Дзанайты Барис. Премьер министрты зæрдыл æрлæууын кодта, Президент Владимир Путины бардзырдмæ гæсгæ 2019-æм азæй нырмæ бæстæйы кæй цæуы контролон-цæстдарæн къабазы реформæ. Арæзт у амалхъомадыл административон уæз фæкъаддæр кæнынæн, æнцовадат уавæртæ сын саразынæн. Дарддæр æххæстгонд цæуы мараторий дæр. Сгæрстытæ æмæ ивартæ ивд æрцыдысты профилактикон ныхас æмæ консультацитæй. Къабазмæ цæстдард у республикæйы экономикон рæзты министрады куысты ахсджиаг здæхтытæй иу. Бæрæггонд цæуынц 14 республикон ведомствæйы æмæ районты 9 администрацийы. Профилон министр Сокаты Марат куыд фехъусын кодта, афтæмæй 2024 азы сарæзтой 178 басгæрсты æмæ 174 профилактикон æркасты.
Хицауады сæрдар бабар кодта ацы здæхтмæ гæсгæ дарддæр дæр архайын. Ноджы ма иу ахсджиаг фарста — нысангонд квотæтæм гæсгæ куыстмæ инвалидты исыны регионалон паддзахадон цæстдард. Цæрджытæн куыстдæттыны комитеты сæрдары хæдивæг Элла Авакова куыд фехъусын кодта, афтæмæй ведомствæ сарæзта 6 профилактикон æркасты æмæ 36 басгæрсты. 26 куыстуаты ныхмæ байгом кодтой барфыстытæ, рабæрæг кодтой 28 фæткхæлды. Дзанайты Барис бæрнон кусджыты размæ сæвæрдта хæс фарста аиуварс кæныны фæдыл.
