Рагон гауыз фæзынд 5-6 -æм æнусы. Йæ æцæг хуыз ис Эрмитажы. Ай та у йæ халдих. Конд æрцыд “Войлок от скифо-сарматского периода до алан-осетин», зæгъгæ, проекты фæлгæты. Косты Иринæ Петербургæй эксперттимæ æмæ консультанттимæ егъау къорды хыгъды цæттæ кодта нывæфтыд,
Ахæм егъау куысты фæрцы æрмдæсны рахызт ног æмвæзадмæ. Национ кæлмæрзæнтæ бийын райдыдта 12 аздзыдæй. Проекты бацархайынмæ йæ куы фæхуыдтой, уæд фыццаг йæ ныфс нæ хаста, стæй сразы æмæ иунæг хатт дæр нæ фæфæсмон кодта. Ахæм къордимæ кусын тынг æхсызгон у, зæгъы сылгоймаг.
Проект æххæстгонд æрцыд Президенты грантты фонды фæрцы. 20 адæймагæй фылдæр – историктæ, нывгæнджытæ, дæснытæ, конструктортæ архайдтой æхсæвыгон дæр. Лæмбынæг кæсын хъуыд æрмæст хуызтимæ нæ, фæлæ ма гауызыл цы фигурæтæ ис уыдонимæ дæр. Иууылдæр хицæн кæнынц.
Проекты фæрцы Иринæ бирæ ног зонындзинæдтæ райста. Къуымбил куыд ахорын хъæуы, композицы аразын, лыстæгдзинæдтæм цæстдарын. Æрмæст гауызыл нæ куыстой. Æмбырдгонд арæзт у 6 дзаумайæ. Уый у бæх æмбæрзæн, саргъыл кæй сывæрынц, лыстæг нывæфтыдимæ цъындатæ, æмæ сæрыл дарæн дзаума – капор, зæгъгæ.
Иу рæстæг проектимæ Иринæ кусы Цæгат Кавказы хæххон-металлургон институты “Технологии продуктов общественного питания” кафедрæйы. Афтæмæй баиу сты дыууæ бынтон алыхуызон дæсныйады. Ныр Иринæ дарддæр архайы кæлмæрзæнтæ бийыныл æмæ кусы университеты. Бийын мæ удынцой у, зæгъы сылгоймаг. Иу куыстæн бахъæуы æфæдзы ‘рдæджы онг.
Раздæр иу чырæг цас лыстæгдæр уыд, уымæй бæрæг кодтой æрмдæсныйы арæхстдзинад. Уый кадджын куыстыл нымад уыд æмæ та ныр парахат кæны Ирыстоны. Национ æрмдæсныйадмæ се ‘ргом раздæхтой æвзонг чызджытæ дæр. Иринæ сæ йæхæдæг ахуыр кæны. Уæдæ æркастыты дæр архайы.
Афтæмæй уарзондæр архайд райрæзт егъау, стыр ахадындзинадимæ куыстмæ. Иринæйы фæнды дарддæр дæр ахæм проектты архайын. Æмæ чи зоны, фидæны йæхи проект дæр расидын.
