Культурон объекттæ хъахъхъæныны фарстаты фæдыл æмбырд сарæзта республикæйы сæргълæууæг Сергей Меняйло

Культурон объекттæ хъахъхъæныны фарстаты фæдыл æмбырд сарæзта республикæйы сæргълæууæг Сергей Меняйло. Вице-премьер Атарты Георгий, арæзтад æмæ архитектурæйы министр Бетанты Марат, культурæйы министр Фидараты Сослан, культурон бынтæ æмæ историон цыртдзæвæнтæ хъахъхъæныны комитеты сæрдар Гæлуаты Ацæмæз æмæ Национ музейы директор Цуциты Асланимæ, фыццаджыдæр, æрдзырдта Дæргъæвсы зæппæдзтыл. Регионы разамонæг йæ доклады рæстæг бабар кодта уым фæлгæсæн фæзуатæн бынат равзарын. Туристтæ “мæрдты сахармæ” æрмæст дардæй кæсдзысты. Зæппæдзты алыварс быру хъуамæ саразой æмæ мидæмæ бахизыны бар уыдзæн æрмæст музейы кусджытæ æмæ специалисттæн. Нырма та уал рæстæгмæ бынат лентæйæ сæхгæндзысты æмæ дзы хъæугæ информациимæ фæйнæджытæ бакæндзысты. Уæдæ туристон къордты разамонджытæн та æнæмæнгæй хъæуы уазджытæн дзурын, ацы мадзæлттæн не ‘гъдау æмæ истори цы ахадындзинад ис, уый.