Быронласæг ног куыстуаты архайдæн аргъ скодтой Æрыдоны цæрджытæ. Кусынц фæткмæ гæсгæ. Алы уынгæн дæр ис йæхи рад. Цæрджыты ныхæстæм гæсгæ, раздæр ацы хъуыддагимæ уыд къуылымпыдзинæдтæ. Суанг ма-иу горæты алы рæтты сывзæрд æнæзакъон бырондæттæ.
Рæстæг – райсомы аст сахаты. Ацафон Æрыдоны цæрджытæ фехъусынц быронласæг хæдтулгæйы уынæр.
Бырон æмбырд кæнынц æмæ ласынц куыстуат «Эра»-йы кусджытæ. Кусынц фæткмæ гæсгæ. Алы уынгæн дæр ис йæхи рад.
Елойты Вячеслав, Æрыдоны цæрæг:
«Ног хæдтулгæ нæм кæй райдыдта цæуын, уый мын æхсызгон у. Адæймаджы бахъæуы æрмæстдæр бырæттæ йæ дуармæ рахæссын. Кусджытæ сæ сæхæдæг сисынц æмæ бавгæнынц хæдтулгæмæ».
Куыстуат «Эра»-йы хæдтулгæтæ Æрыдонмæ нырма æрмæст цалдæр къуыри цæуынц, фæлæ йæ цæрджытæ ныридæгæн бафиппайдтой, уавæр хорзырдæм кæй аивта, уый. Бырон ласынц куыд хæдзæртты цурæй, афтæ дуканитæ æмæ ахуырадон уагдæттæй дæр.
Дзапарты Эльбрус, регионалон оператор «Эра»-йы инспектор Æрыдоны районы:
«5 хæдтулгæйы нæм ис. Фаг кæнынц. Кæд исты къуылымпыдзинæдтыл сæмбæлæм, уæд нæ разамындмæ бадзурæм æххуысмæ. Уыдон фарста аиуварс кæнынц. Кусæм къуырисæрæй сабатмæ, куыд Æрыдоны, афтæ районы хъæуты дæр».
Ацы хъуыддаг Æрыдоны цæрджыты рагæй тыхсын кодта. Адæм хъаст кодтой, горæты къуымты æнæзакъон бырондæттæ кæй фæзынд, уымæй. Уыимæ ма бирæтæ бырон ласыны лæггадæн нæ фыстой. Тариф у 38 сомы мæймæ иу адæймагæй.
Сергей Соболев, Æрыдоны бынæттон хиуынаффæйады сæргълæууæджы хæдивæг:
«Горæты хи хæдзæрттæ фылдæр ис. Къуыри иу хатт алы уынгыл дæр æрзилы хæдтулгæ. Адæм та йе ‘рбацыдмæ рахæссынц æппаринаг дзæкъултæ. Кусджытæ сæ аласынц полигонмæ».
Куыстуат «Эра» лæггад кæны æппæт районты цæрджытæн, Мæздæджы районæй фæстæмæ. Æрæджы сæ хæдтулгæтæм бафтыдтой 4. Кусдзысты Дзæуджыхъæуы Цæтат-Ныгуылæн районы.
Дзæдзойты Фатимæ
