Мæскуыйы цæуы чингуыты фестиваль. Бæстæйы сæйрагдæр фæз «Сырх фæзы» быруйы алыварс равæрдтой чингуытæ. Архайынц дзы куыд зындгонд рауагъдæдтæ, афтæ, ныридæгæн уыцы хъуыддаджы фыццаг къахдзæфтæ чи кæны, ахæмтæ дæр. Æрвылазон мадзал саразыныл бацархайдтой мыхуыры æмæ дзыллон коммуникациты Федералон агентад, УФ-йы культурæйы министрад æмæ Мæскуыйы хицауад.
Мæскуыйы сæйраг фæз цалдæр бонмæ сси стыр литературон бæрæгбоны бынат. Чингуыты 7-æм фестиваль – Уæрæсейы егъаудæр мадзæлттæй иу. Архайынц дзы 300 рауагъдады нæ бæстæйы алы регионтæй. Цæгат Ирыстонæн дæр ис сæрыстыр цæмæй уа, уый, æмæ йæ республикæйы делегаци æвдисы.
Чингуыты фестивалы ис балхæнын рагæй кæмæ æнхъæлмæ касттæ уыцы чиныг. Диссаджы уавæртæ æмæ зынгонд фысджытимæ аныхас кæныны фадат. Уымæй уæлдай, фестивалы 12 фæзыл ацæудзæн 500 мадзалы. Се ‘хсæн презентацитæ, лекцитæ, концерттæ, дæсныйад æвдисæн ахуыртæ æмæ спектакльтæ.
Фестиваль æрвылаз йæхимæ æлвасы сæдæгай адæм. Уый та ууыл дзурæг æмæ чиныг абон дæр адæм кæсынц.
Фестиваль цæудзæн 20 июнмæ. Æххæст дзы кæнынц Уæрæсейы фæлхасгæнджытæм цæстдарды управленийы санитарон домæнтæ. Æрмæст маскæтæ, социалон дистанци æмæ билеттæ онлайн æлхæнгæйæ ис хи тæсссаг низæй бахъахъхъæнын.
