Мæскуыйы адæмыхæттыты хæдзары уыд Уæрæсейы композиторты цæдисы уæнг Бæтæгаты Татьянæйы чиныг «Музыкальное искусство Осетии XX-XXI веков. 50 композиторских портретов»-ы презентаци. Автор дзы æвдисы композиторты сфæлдыстад æмæ биографитæ. Мадзалы уазджыты ‘хсæн уыдысты ахуыргæндтæ, æхсæнадон архайджытæ, Уæрæсейы президенты цур Цæгат Ирыстоны минæварады уæнгтæ, Мæскуыйы ирон æсхæнады минæвæрттæ æмæ музыканттæ.
Бæтæгаты Татьянæ радзырдта, чиныгыл куыд куыста, уый, стæй композиторты националон скъолайы тыххæй. Презентацийы ма азæлыдысты ирон композиторты куыстыты скъуыддзæгтæ. Профессионалон æхсæнады минæвæрттæ фæнысан кодтой чиныджы стыр ахадындзинад. Сæ хъуыдымæ гæсгæ, стыр пайда уыдзæн канд ацы къабазы кусджытæн нæ, фæлæ националон музыкалон аивад кæй цымыдис кæны, уыдонæн дæр.
