Курорт Мамысонмæ хæстæг зæххытыл дарддæры арæзтады сæрмагонд фæтк снысан кодтой. Уый тыххæй журналисттæн радзырдта республикæйы сæйраг архитектор Цæллагты Алыксандр.
Арæзтадон уагæвæрд хъæуы Мамысоны алыварс историон хъæздыгдзинад бахъахъхъæнынæн. Курорты алфамблай ис рагон дзæппæзтæ, мæсгуытæ. Фыдæлтыккон архитектурон арæзтæдтæ цымыдис кæндзысты туристты дæр. Уый фæрцы фылдæр базондзысты ирон адæмы традицитæ æмæ æгъдæутты тыххæй. Регламент æххуыс уыдзæн курорты инфраструктурæйы райрæзтæн. Зæгъæм, фысымуæттæ, хæдзæрттæ кæнæ дуканиты арæзтады. Уагæвæрды фыст уыдзысты цавæр хуызы æрмæджытæй æмæ цавæр ахорæнтæй спайда кæнын хъæуы, уый.
Зæгъæм, æддаг къул аив кæнынæн амынддзинадмæ гæсгæ хъæуы традицион хуызы сæрдын. Нæхи дур, нæхи хъæдæрмæг, авг æмæ афтæ дарддæр. Згъæрæй конд арæзтæдтæ рæстæгимæ бæзгæ вæййынц, райсынц æрдзон хуыз, фæлæ уый хыгъд уый дæр у экологон архитектурæйы дæнцæг. Бæстыхæйтты сæртæ æмбæрзыдзысты згъæрæй конд, науæд та хъæдæрмæгæй конд конструкцитæй. Пайда ма кæндзысты агуыридур æмæ æхсонæй конд æрмæджытæй.
