Михайловскæйы дон ныр къуырийæ фылдæр нæй. Цæрджытæн сæ бон нæ хæринаг скæнын у, нæ хæдзары куыстытæ бакæнын.
Адæмæй раст хъарагъултæ рауад. Рад хæссынц, дон кæд ракæлдзæн, уый хъахъхъæнынц. Суанг æмбисæхсæвмæ баззайынц, кæд гыццыл йæ хъæстæ фæуиккам, зæгъгæ. Фæлæ фæстаг æртæ суткæйы цъыртт дæр нæ ракалд.
Цæхæрадæттæ æмæ дыргъдæттæ дæр хъæуы донæй бафсадын. Уæззау уавæры стæм – дзуры Елена ВелИчко. Сылгоймаджы дидинæгдоны уардитæ рагæй зад. Ныр зайæгойтæ æмæ бæлæстæ хус кæнынц.
Адæм куыд радзырдтой, афтæмæй къуылымпыдзинæдтæ зымæджы райдыдтой. Январæй фæстæмæ æлхъывдад чысыл уыд. Адæмæй уæд æмбæрстой сæрды сæм цы æнхъæлмæ кæсдзæн, уый. Фыстой донæй æххсæтгæнæг куыстуат æмæ администрацимæ. Фæлæ цæрджытæ цæмæй тарстысты, уый сыл æрцыд.
Хъæумæ æрцыдысты Донæй æфсадæг куыстуаты специалисттæ. Сæ ныхæстæм гæсгæ бынаты хъæуы ног донцъирæн сæвæрын. Уымæн бахъæудзæн æртæ къуыримæ хæстæг. Куыстытæ ныридæгæн цæуынц. Уыцы рæстæгмæ адæмæн ныфс æвæрынц, донæй сæ кæй ифтонг кæндзысты, уымæй.
Ольгинскæйы дæр уавæр хуыздæр нæу. Хъæуы ис æрмæст иу донгуырæн, сахатмæ дон дæтты 120 кубометры. Ахæм хъомыс æртæ мин цæрæгæн фаг нæу. Уæлдайдæр та сæрдыгон. Адæм чъизийæ ныууадзынц хæдзары дзауматæ, дарæс, нæй сын сæхимæ базилыны фадат дæр. Хуымæтæг къæвда та сын бæрæгбон у. Бирæтæ сæвæрдтой стыр боцкъатæ æмæ уым дон фæстауæрц кæнынц.
Донæй æххæстгæнæг республикон куыстуат къахы ног цъай 200 метры арфæн. Специалисттæ зæрдæ æвæрынц – донгуырæн дæтдзæн 160 кубы дон сахатмæ. Уый фæфылдæр кæндзæн гуырахст æмæ хъæуы уæллаг хаймæ дон æнæкъуылымпыйæ кæлдзæн.
Хъæуы æрмæст æнхъæлмæ кæсын. Специалисттæ архайдзысты донгуырæнтимæ. Адæмы та ныфс ис сæ фарста сын кæй аиуварс кæндзысты, уымæй. Æмæ сын хуымæтæг хъуыддæгтæ дон бануазын æмæ гæрзтæ ныхсын бæлиццаг нал уыдзысты.
