Æрмæст Хуыцаумæ скувыны фæстæ, Плиты Неля бавнæлдта сыгъдон цæттæ кæнынмæ. Уый тыххæй та хъæуы ссад басудзын, æрмæст, цæмæй аджы быныл ма фæхæца. Мигæнæнтæ змæнтæн сылгоймагæн баззад йе ‘фсинæй, бæгæны фыцын дæр æй уый сахуыр кодта. Бацамыдта йын, кувинаг цæттæгæнгæйæ, æппæт кусæнгæрзтæ дæр хъуамæ æвæрд уой аджы рахиз фарс, архайын дæр хъæуы æрмæст рахиз къухæй, уымæн, зæгъгæ, ис сокралон нысаниуæг. Абон йæ хистæры фæдзæхстытæ æмæ амынддзинæдтæ Неля æнæзивæг æмæ æнæмæнг сыгъдæг зæрдæйæ æххæст кæны.
лайф
Ссад æвдулын куы райдайа, уæд æй уайтагъд бамбардзынæ, зæгъы Неля. Ацы къæпхæныл æй ис дзыккаимæ абарæн. Аджы ныккодта дон, систа ссады сыгъд, дарддæр æнæмæнг зад æмæ хæрз чысыл цъата.
Æмæ æцæгдæр, зады фæстæ бæгæныйæн фæзынд бынтон æндæр, зæрдæмæдзæугæ тæф. Фæлæ, уый ууыл дзурæг нæу, æмæ нуазинаг цæттæ у. Хоры фæстæ бæгæнымæ хъæуы лæмбынæг кæсын, змæнтын, цæмæй бæзджын кæнын ма райдайа.
Дыууæ ведрайы дзаг бæгæны рафæрсыгъта æмæ та йæ ногæй бауæларт кодта. Бафтыдта йæм дыууæ килæ сæкæр æмæ дыууæ къухы дзаг хуымæллæг, дзырдæн, уый дæр, æфсинмæ зайы йæхи цæхæрадоны. 20-30 минуты куы фæфыца, уæд æй райста уæлартæй.
Уыцы изæр Неля бæгæныйыл бафтыдта æнтуан æмæ дыууæ боны фæстæ æнхъизын райыдта. Сылгоймаджы конд бæгæны канд хъæубæсты нæу зындгонд. Цалдæр хатты архайдта бæгæныфыцджыты конкурс-фестивалы, бацахста дзы иу раззагдæр бынæттæ. Æрвылаз кувинаг сфыцы рагацау æмæ уыцы æгъдауыл ахуыр кæны йæ кæстæрты дæр.
Неля хъæуы кадджын сылгоймагыл нымад у. 35 азы кусы ветеринарон дохтырæй, схъомыл кодта
дыууæ лæппуйы æмæ чызг, йæ хъæбулы хъæбултæ та сты авдæй. Лæгты Дзуармæ кувæн къури куыд Ирыстоны дзыллæтæ, афтæ Плиты бинонтæ дæр кувынц æмæ курынц сабырдзинад, æнæниздзинад æмæ бæркад.
